Mizoram Youth Development Society buatsaih, Mizo tawnga career guidance lehkhabu hmasa ber, “Zirlaite Hmakhawthlir” tih lehkhabu chu vawiin khan Parliamentary Secretary Pu Chawngtinthanga’n Vanapa Hall-ah a tlangzarh.

He lehkhabu ah hian thalaite tana hna zawn dan leh sorkar hna thawh tumte tana hriat tur pawimawh te, hna peng hrang hrang atana zirna kawng zawh tur leh a kalkawng te, sorkar leh company lian hnuaia hna thawh theih te, competitive exam hrang hrang bei turte tana hriat tur te, hna thawh tur tha hriat lar si loh te tarlan a ni a. A vawi khatna ah copy 70000 chhut nghal a niin Rs.50/- man a ni.

Thu sawiin Pu Chawngtinthanga chuan, duhthlan tur tam loh vang leh kawng kawh hmuhtu neih that loh vangin anni ang rual mi tam takin a remchang apiang zirin hna remchang apiang an thawk tih a sawi a. Tunlai huna zirlaite chu an vannei bik hle a ni, a ti. Zirna leh eizawnna kawnga intlansiakna ah zirlaite chu mahni theuhva an inhai chhuah a la tul dawn avangin tun atanga inbuatsaih nachang hre turin a chah a.  Zirlaite Hmakhawthlir lehkhabu atangin an kawng zawh tur thlang a, goal insiam fel tur leh chumi lam hawia pen ngar ngar turin a fuih a. Chutianga tum nei fel sa leh chumi atana inbuatsaih nachang an hriat chuan engti kawng mahin an hlawhchham lovang, a ti bawk.

Lehkhabu tlangzarh inkhawm hi Pu C.Lalthanzauva, Patron Member, MYDS in a kaihruai a. Khualzahawm, Dr. D.Baruah MS chuan Mizoram mamawh ber chu quality education a nih thu a sawi a. Pu Daniel Hauhnar in lehkhabu chhung thu thlirlawkna neiin Pu J.Lalfakzuala, Sikkim Manipal University, Mizoram Center chuan lehkhabua tel lo, Charter Accountant zirna kawng sawizauna hun a hmang a ni.