Mizoram tlawha lo zin mek Chief Justice Gauhati High Court, Justice MB Lokur chuan vawiin chawhnu khan New Capital Complex-a Administrative Training Institute a tlawh a, Mizoram Judicial Service officers te tana training an buatsaih chhoh tur atana hmunhma a enfiah a ni

Chief Justice Lokur chuan hmarchhak state hrang hrang-a judicial officers te tan training an nei mek chu a zawngchhang tlak hle a, judicial officers te pawhin an hnaah an hlawkpuiin an tangkaipui hle tih hmuh a ni, a ti a. Khawvel inthlak chak takah hian dan leh hrai khawitute hian intuaithar a, thil tharte pawh an hmelhriat zel a pawimawh zia sawiin Justice Lokur chuan hmarchhak bial-ah hian cyber crime pawh a thang chak hle a, hetiang tunlai khawvel sualna leh thil tharte pawh belhchian hian case-a rorel dan turah pawh an hna a ti awlsam zawk thei a ni, a ti bawk. Mipuite pawh hian judicial officers te hi a thei anga tam training pek leh tunlai khawvel mil zela tuaihriam  tum a ni thu sawiin hei hian mipui mamawh an phuhruk leh zual theih nana tih a nih avangin  mipuite pawhin an ring tawk ngam tur a ni, a ti.

Thla thar 10-11 September chhung khian Mizoram Judicial Srvice officers te tan ATI-ah hian environmental issues chungchangah World Wildlife Fund (WWF) India ten training an rawn buatsaih sak dawn a. Thla tinin MJS officers tan thupui hrang hrang hmangin training neih chho tum a ni nghe nghe.

Chief Justice Lokur hi Zirtawpni-ah Champhai-a District Courts te a tlawh ang a, Inrinni-ah Aizawl let lehin Pathianni khian Gauhati panin a haw leh dawn a. Tun tum hi Mizoram a tlawh tum 3-na a ni nghe nghe a ni.