Vawiin chawhma khan Gauhati High Court Chief Justice Ajit Singh chuan Lunglei District Court-ah sawrkar hotute leh Judicial Officer te kawm in, September ni 22-a thil thlen dan leh hmalakna te an hriattir a. He thil thleng avanga Judicial Officer te sawn tura hriattirna chhuah chu sut in, an awmna ngai a let leh a hna chhunzawm thuai turin a hriattir nghal a ni.

Chief Justice Ajit Singh chuan Lungleia thil thleng duhawm lo tak chu India ram hmundanga la thleng ve ngailo a ni tiin, mipuiin harsatna an tawh phah chu pawi a tih thu a sawi a, tun hnu lama thleng nawn tawh lo tura a beisei thu a sawi a ni. Lunglei District Court-a Judicial Officer, staff leh thubuai nei lai te sahimna chu a ngaih pawimawh thu sawiin, district thuneitu te pawhin dan rorelna tha taka an thlawp a duh a ni. Mipuiin harsatna an tawh chhunzawm loh nan, Judicial Officer sawn chhuah tak te chu an awmna ngaia let leh turin thupek a chhuah nghal a ni.

Chief Justice Ajit Singh hi nimin tlai khan Lunglei rawn thlengin, kohhran, tlawmngaipawl leh khawtlang hruaituten an hmu a, thil thleng chu pawi an tih thu leh Court chu a pangngaia kal tir leh turin an lo ngen a. Tukin khan District Court building leh Judicial Quarters, PWD in an thawm that chu a enfiah nghal bawk a ni.

Justice Michael Zothankhuma, Gauhati High Court; Gauhati High Court Registrar General Pu H.K. Sharma, Registrar-cum-Principal Secretary to Hon’ble the Chief Justice Pu Ratkim Duarah; Pu T. L. Guite, Registrar Gauhati High Court, Aizawl Bench; Senior Judicial Assistant Pu Lalngaihzuala leh Pu M.C. Kailiana, Deputy Registrar, Gauhati High Court Aizawl Bench te in Chief Justice hi an tawiawm a ni.