Disaster Management & Rehabilitation Department buatsaih naupang kum 10 -14 tan a State Level Painting Competition a lawmman dawngtu mi pathum te hnenah DM & R Minister Pu Ngunlianchunga chuan vawiin khan a office ah lawmman te hi a hlan. He Competition ah hian thupui thlan bik ‘Disaster Vrs Collective Strength’ leh ‘Disaster Risk Management begins at Home/School’ hmangin naupang 82 te chu lemziak intihsiaknaah hian an tel a ni.
Intihsiakna a tel naupangte ngaihtuahna a ropui in kum naupang te ni mahse an rilrua an ngaihtuahna lemziak hmanga an entir chhuak thiam chu chhuanawm tiin, hei tak hi DM & R Department pawhin a tum a ni a, naupang leh zirlaite thinlungah chhiatna laka himna tur ngaituahna tuh a nih thu leh chu chu a hlawhtlinna lang theia pho chhuah ani ta chu lawmawm a tih thu a sawi.
Mizoram hi lirnghing zawnah awm mahse Pathian zarah tun thleng in tumah lirnghing avanga nunna chan an la awm lo, chumi avangin inthlahdah tur a ni lova, inring renga awm a ngai a, chhiatna lo thleng ta se engtin nge kan inven ang tih ngaihtuah a tul takzet thu Minister chuan sawiin Thli leh ruah, rial, sabereka khuangkaih, thingtlu, leimin leh khuarel chhiatna thlen thei a dangte lakah hian dan theih ni lo mahse kawng tam takin lo inven dan a awm a, kan in leh a vel te a him em, kan tuiluanchhuahna inhnawh leh fello a awm em, keimahni avangin midangte’n chhiatna leh harsatna an tawk thei em tih te enfel a ngaiin midangte bakah keimahni ngei sahimna pawh kan ngaihtuah a ngai a, kan hnathawhna hmun leh kan thawhna hmanrua te an him em tih te thleng pawh a enfel chu mitin in kan tih theih a nih avangin kawng tam takah chhiatna thleng thei hi ven theih a ni a, chutih rualin naupang zawkte pawh hetiang lam ah hian kan zirtir a ngaih thu a sawi bawk ani.
Kan ram Mizoram ah hian chhiatna lo thleng ta se, Sorkar hian tun dinhmunah tih theih ropui a nei lo, SDRF sum Central atanga hmuh te chu a hmanna tur duansa veka sem chhuah thin a ni a, chhiatna lo thlen hnua chhawmdawlna atana hman anih thin avangin a invenna tur ruahmanna lamah duh angina sum a indaih theih loh thu DM & R Minister chuan sawiin mi zawng zawng hian chhiatna lo thleng thei lakah lo inven dan tur leh hmachhawn dan tur hriat a ngai a ni a ti a. Department chuan theih tawkin hma a la in thawktu te thahnemngaihna pawh a fakawm a, chutih laiin zirtirna inpek hi a that rual in hei ringawt hi a tawk lova, mahni ngaihtuahna te pawh hman thiam a tul thu a sawi bawk a ni.
Pu C Lalpeksanga,Director DM & R kaihhruai vawiin programme ah hian Lemziak endiktu te zinga mi Pu Dominic Lalhmangaiha chuan thu sawiin an endik dan kalphung a sawifiah a, thupui ziahfuh a ni em tih te uluk taka an endik thu leh naupangte fuihna leh thurawn tha tak tak a sawi bawk.
Lemziak intihsiaka lawman dawngtute chu :
1st Prize : Lalmuanpuii d/o Vanlalsiama, P.C Girls School
2nd Prize : C.Lalchhandami d/o C.Lalthansanga, Mary Mount School
3rd Prize : H.Vanlalduhsaki d/o H.Remliana, Mary Mount School
Lawmman pakhatna hian Rs.5,000, pahnihna in Rs.4,000 leh pathumna in Rs. 3,000 an dawng a ni.
Heng School naupang lawman dawngtute hian 3rd – 5th November ah hian “Asian Ministerial Conference on Disaster Risk Reduction – 2016” New Delhi a neih tur denchhena National Level Painting Competition awm turah an tel ang.
