1742/2023-2024

Dated Aizawl, the 2nd September, 2023: Vawiin khan Gauhati High Court, Aizawl Bench Building thar, MINECO a mi chu Chief Justice of India, Dr Justice Dhananjaya Y Chandrachud chuan a hawng. A hawnna inkhawmah hian Chief Minister Pu Zoramthanga, Union Minister of state, Ministry of Law & Justice, Pu Arjun Ram Meghwal,  leh Gauhati High Court Chief Justice, Justice Sandeep Mehta te an tel.

Chief Justice of India chuan, Gauhati High Court, Aizawl Bench building thar hawn theiha a puitlinna atana theihtawp chhuahtu sawrkar laipui, Mizoram sawrkar, district administration, PWD department leh midangte chungah lawmthu a sawi a. Ram inrelbawlna kawngah Court hian mawhphurhna pawimawh tak a luah avangin a hmunhma tha, thawktuten felfai taka hna an thawh theihna neih a pawimawh a; amaherawh chu a hmunhma tha aia pawimawh zawk la awm kan hriatreng tul chu; democracy innghahna lungphum pawimawh dan hmanga rorelna (rule of law) dinpui a ni, a ti. Vawiina kan hawn Aizawl Bench building thar pawh hian he ram hi dan hmanga enkawl a nihzia a tifiah a, dan hmanga rorelna hi he ram chelhnghehna pawimawh tak hi a ni, a ti. Gauhati High Court hian danglam bikna tak a neih pakhat chu state pali huamah hna a thawk hi a ni a, a mawhphurhna hi a pawimawh em em a, vawiina kan hawn thar Aizawl bench building thar pawh hian nasa takin hma a sawn zelna turah a thawhhlawk hle dawn a ni, a ti bawk.

Pu Zoramthanga pawhin he hunah hian thusawiin, Chief Justice of India in Gahati High Court Aizawl Bench building thar a rawn hawng thei chu lawmawm a tih thu a sawi a. Mizoram chu India in separation of juduciary a kalpui khan hmarchhak state-a a taka kalpui hmasatu kan ni a, chutiang bawkin  Lok Ayukta a lo chhuah leh pawhin Mizoram chu hmarchhaka a kalpui hmasatu kan ni leh a ni, a ti. Tun hmaa underground kaihruai thintuin vawiina High Court building ropui tak hawnnaa thusawina hun ka hmang thei hian India ropuina leh a chhungah hnam chitinte kan lenzia a tilangfiah a ni, a ti. Tun hnaia Mizoram chhehvela harsatna thleng vanga Mizorama raltlan an luh nasat thu tarlangin Mizoram chu remna leh muanna tluantling awmna ram anih avangin a chhehvela buaina leh harsat tawk kan unauten he remna leh muanna boruak hi pu darha, an hnena thlentirtu ni turin min beisei mek a ni, a ti bawk.

A lawmna inkhawmah hian Justice Sandeep Mehta, Chief Justice, Gauhati High Court chuan kalkhawmte lawmna thu a sawi a, Pu Arjun Ram Meghwal, Union Minister of State pawhin thusawina hun a hmang a ni.

Gauhati High Court Aizawl Bench Building thar hi NLCPR sum Rs. 4624.12 lakh senga sak niin contractor hi North East Consultancy Services, Aizawl an ni a, dt 7.3.2017 ah hna hi thawh tan a ni. A building pui ber (main building) hi mizo chhiar danin chhawng li a sang a ni a, a chhuat palite zau zawng belhkhawm hi 11612.98 sqm a ni. Building pui ber bakah hian Advocate building leh visiting judge bungalow te pawh sak a ni.

A lawmna inkhawm hi Justice Michael Zothankhuma, Judge, Hauhati High Court chuan lawmthusawiin a khar a.