Chief Minister Pu Lal Thanhawla chuan vawiin khan India hmarchhak biala a hmasa ber tur Bukvannei, Kolasib Distict ah Godrej Agrovet Ltd, Mumbai ina a bun, Oil Palm Mill chu a hawng.

Hawnna inkhawm Mill tualzawla buatsaihah Chief Minister chuan Mizorama agriculture hmasawnna kal mekah vawiin hi ni bik leh chhinchhiah tlak a ni a ti a. Palm Oil herna khawl buntu Godrej Company chu an bungrua siam atangte avangin Mizote zingah a mikhuallo hle a ni a ti a. Industry la awm lohna state Mizoramah Oil Palm Mill rawn dintu, India rampum tana thawhhlawk tak, industrialist Pu Nadir B.Godrej, Chairman, Godrej Agrovet Ltd ngei a lokal hi kan lawmna tizualtu a ni a ti a. An ni hi mite tana eizawnna siam saktu an nihnaah lawmthu Chief Minister hian a sawi a. Hriak herna hmunpui hawn anihna hian Mizoramin industry tia sawi theih kan neih hmaak ber a ni hi kan lawm hle a ni a ti a.

Chief Minister chuan Mizoram chu a awmna hmun avangin ankalpawhna kan neih chhun chu motor kawng a ni a, industry din hi a awlailo a ni a ti a. Godrej Company avang chauhin hetiang khawl lian tham hi kan nei thei a ni a ti a. Tlakchham kan neihna Eduation, Health Care, Micro & Medium industry leh infrastructure siamna lamahte Godrej hian investment min neih sak thei se a duhawm hle ani a ti a. Central sorkar pawhin hmarchhak bial hausakna chu rawn hre pawp tawhin tunah hian kan thenawm ram Bangladesh, Myanmar, Bhutan leh Nepal te nen inkalpawhna lamah hma lak mek a ni a ti.

Oil Mill hawn tak hian India ina a hriak a mamawh enemawzah chu a phuhruk ngei a beiseiawm a ni Pu Hawla chuan a ti a. Loneimi thahnemtak tunah an Oil Palm chingin an inhmang mek a ni tiin, heng loneimite hi tam zawk tharchhuak tura chawhphur thiam an tul hle dawn a ni a ti. Mizoram hi inkalpawhna tha kan nei loh avangin Oil Palm chin tamna Mamit district atanga phurh luhna lamah harsatna a awm thei a ni a ti a. Chief Minister chuan Pu Godrej hian engtikah emaw chuan hriak thlitfimna refinery pawh ala rawn bun duh ngei a beiseiawm a ni a ti a. Hemi nei tur hian loneimite pawhin tan la mar tlata, hriak herna khawl hi chawlloa hna a thawh theihna turin tam zawk tharchhuak turin loneimi thahnemtak hawnna inkhawma kalte chu a chah a ni.

Chief Minister chuan Oil Plam hriak herna khawl hawn tak hian Mizoram economy a chawikan ngei a beisei thu a sawi bawk a ni.

Agriculture Minister Pu R.Lalzirliana pawhin thusawiin, Godrej Comapny inpekna chu a lawmawm hle a ni tiin, kan hlawhchhampui mai ang tih chuk ka hlau a ni a ti a. Oil Palm chingtu zawng zawngte chu tha thlah miah loa, tam tak tharchhuah reng a nih theih nan tang mar pat reng turin a chah a ni. Milla thawk ten harsatna reng reng an nei anih chuan tanpui kan inpeih reng a ni a ti. Godrej Comany chu refinery min siamsak zui thei se tih a duhthu a sawi bawk.

Pu Nadir Godrej chuan Mill an dinnaah Mizoram sorkarin phur taka a tawiawm avangin lawmthu a sawi a. Oil Palm hian hriak nei dangte aia tam taka hriak a pai thu a sawi a. Rfinery din tur chuan tam tak oil palm a awm angai hmasa a ni a ti.

Hawnna inkhawmah hian Balram Singh Yadav, MD,GAVL leh Dr.Anupam Barik, Addl Commissioner (Oil seeds)Govt of India ten thu an sawi bawk a ni.

Inkhawm hi Pu Lalram Thanga, Principal Secretary, Agriculture in a kaihruai a ni.

Oil Palm Mill hi ram luah hi 27.88 hectare a ni a, khawl hian darkar khatah hriak metric tonne 5 a herchhuak thei dawn a, Oct 2014 thleng a her tawh zat chu 912.50 Metric tonne a ni. Hriak hralhna man thar ber chu metric tonne khat Rs. 5,500/- a ni a,oil palm lei khawlna hmun 75 a awm bawk a ni. Mill dinna senso zawng zawng chu Godrej Agrovet in Rs.17 Crore vel leh Mizoram sorkarin Rs.2.5 Crore a ni a, avaiin Rs. 19.50 sen a ni.