Nimin khan Kolkata khawpui a Nabanna Sabhaghar Secretariat-ah  Chief Minister Pu Lal Thanhawla chu Bangladesh nena ramri intawm India State  dang 4 Chief Minister te leh  Union Home Minister 2 te inkawmnaah a tel a. He meeting pawimawh tak hi Union Home Minister Pu Rajnath Singh in a kaihruai a; West Bengal Chief Minister Pi Mamata Banerjee,  Assam Chief Minister Pu Sarbananda Sonowal leh Union Home Minister of State Pu Kiren Rijiju te pawh an tel a. Union Home Minister te leh Chief Minister te chuan ramri venhimna kalpui dan tur chungchang, Raltlan India rama rawn lut thin te chungchang, Ramri hungna chungchang leh thil pawimawh dang te an sawiho a ni.

Union Home Minister Pu Rajnath Singh kaihhruai, Bangladesh Bordering States leh Ministry of Home Affairs(MHA) meeting-ah hian Mizoram Chief Minister Pu Lal Thanhawla chuan Ramri hung vanga  ramri hrula chengte eizawnna tihchhiat a nih thu te leh heng loneituten thlawhhma an neih leh theihna tura ramri hung that chu Mizoram in a phut tih te leh Border Fencing  awmna chu Mizoram tana ram ti heklo thei ang bera  Zero Line ah sawn ni zawk sela a duh thu te a sawi a; Myanmar tualchhung buaina avanga Mizoram chhim lam District chhunga raltlan rawn lut thin chungchang leh Central sawrkar leh Mizoram sawrkar thawhho tulna te a sawi a. Rohingya ho vangin Mizoram in harsatna tawklo rih mahse a Mizoram chu a inrinlawk a ngaihthu leh Central pawh in Mizoram ramri venna an rawn thuam that pui a ngaih thu a sawi bawk a ni.

Meeting a Report pek dan chuan kum 2014  leh Kum 2017 September thla inkarah Mizoram ramri hrulah dan bawhchhiatna a awmloh thu Border Security Force(BSF) chuan a tarlang a. Hetih lai hian West Bengal, Assam, Meghalaya leh Tripura state chhungah te BSF chuan lungawilohna thuziak thehluh 16,550 an dawng a, chung lungawihlohna thuziak theluh zinga 6229 chu thutlinga pawm niin FIR nen bawhzui anih thu tarlang in case 658 kaihnawihah hremna pekchhuah a nih thu an tarlang a ni. Meetingah hian ramri hrul venhimna tichak turin Border Protection Grid(BPG) din a nih tur thu sawi a ni a; Border Area Crime Control and Security  hna thawk turin state tinah State Police DGP kaihhruaiin Task Force din tura ruahmanna siam a ni. MHA chuan ramri hrul state 5 ah Ramri hungna pawna khua la awm mek 148 a awm tih a tarlang a heng khaw hrang hrang chhunga mipui cheng belhkhawm chu 53,444/- a ni a; Mizoram bikah Mizoram bikah ramri hungna pawnah khaw 21, achhunga mihring chengte belhkhawm mi 3128 , a awm mek tih a tarlang a; ramri hungna pawna khaw awm mek te sengluh hna chak zawka thawk turin state thuneitute a ngen a ni. MHA in  State 5 te Border Area Development Programme(BADP) atana sum a ruahman zat a tarlan dan chuan - kum 2017-18 chhungin Assam tan Rs.56 Crore, Meghalaya tan Rs.25 Crore, Mizoram tan Rs. 46 Crore, Tripura tan Rs.71 Crore leh West Bengal tan Rs.122 Crore ruahman sak a ni a; Mizoram hian a chan tur atangin Rs.40.07 Crore a la tawh a ni.

Bangladesh Bordering states leh Ministry of Home Affairs(MHA) meeting-ah hian Pu PC Zoramsangliana, MLA leh Pu Nihar Kanti, MLA  te bakah Pu David H. Lalthangliana, OSD, Home Department te an tel a. Pu PC Zoramsangliana, MLA leh Pu Nihar Kanti, MLA  te chuan ramri hung a nih dawn in ramri hrula chengte rawnna neih a ni lova; an khawsak phung zirchiang hmasa lo in thil kalpui a nih thu an sawi a. Contractor ten an remchan dan zawnga hna an thawk mai chuan thingtlangmi tam tak ramri hung pawnah a dah bakah an huan leh lo neihna te pawh tlawh pawh hleih theih lohah  a siamsak tih an sawichhuak a ni.