No.7913/2020-2021

24.3.2021:Zan thum riak tura Champhaia kal Chief Minister Pu Zoramthanga chuan vawiin khan Champhai khawpui chhunga sawrkar hmalakna pawimawh thenkhat a hmunah a enfiah.

Chief Minister hian Champhai DC buatsaiha amah lawmna inkhawm tawi Circuit House-a buatsaihah Champhai chu sumdawnna hmunpui, commercial centre bakah cultural centre pawimawh tak a la nih theih thu a sawi a. Chumi atana ruahmanna leh remruatna te sawiin, Champhai chu ei leh barah, agriculture a ni emaw, Horticulture lamah a ni emaw, district chauh nilo, state pum tana tangkai tak a nih thu a sawi a. Thenawm ram nena insumdawntawnna atana pawimawh highway laih mek chu Mizoram economy hnukpui a nih tur thu leh, he ram leh ram insumdawntawnna turah hian Champhai pawimawh zelna tur te a sawi bawk.

Myanmar atanga Mizoram rawn raltlante chungchangah Chief Minister chuan loh theihlohna avanga mahni sahimna zawnga lo kal kan unaute tuamhlawm chu kan tih ve ngei tur a nih thu a sawi a. Sawrkar laipuiin lo dang tura thu a pek chungchangah Union Home Minister-ah thu thlenin, mangang a lo raltlan te ei tur pe thei lo, riahna pe thei o nih chu mihring nihphung a nih loh thu thlenin, ngaihtuahna thar seng tura a tih thu leh, Delhi-ah sawrkar laipui hotute dawr turin palai a tirh thu te a sawi bawk.

Champhai North bialtu MLA Dr. ZR Thiamsanga leh Champhai South bialtu MLA Pu TJ Lalnuntluanga pawhin Chief Minister an lawmna thu an sawi a ni.

Chief Minister hian Old DC Complex-a Champhai Auditorium sakna tur hmun a tlawh a. August ni 1, 2020 zan ruahsur nasa tak avanga Champhai Kanan Veng thlanmual minin harsatna a thlente leh kum 2013 atanga intan Champhai Kanan Veng lei chein a nghawngte a enfiah bawk.

Kum 2019 atanga tharthawh leh Mizoram Urban & Regional Development Act, 1991 dungzuia duan Champhai Master Plan, ram hectare 4780.48 a zaua Town Planning kalpuina tur leh awmze nei zawka Champhai khawpui leh a chhehvel cheibawla hmasawnna ruhrel siamna tur Champhai Master Plan 2031 hmalak mekna leh hmachhawpte Darthlalang tlang atangin a thlir a. UD&PA Department kaltlanga cheng nuai 25 senga District Hospital panna kawng laih zauh mek leh District Hospital Champhaite tlawh bawkin, hospital thawktute nen inkawmna hun a hmanpui bawk a ni.

Chief Minister hi bialtu MLA te bakah DC Pi Maria CT Zuali, SP Pu Lalrinpuia Varte leh district hotu dangten an tawiawm a ni. CM hi naktukah Zokhawthar Land Customs Station leh Champhai chhehvela hmalakna dang thenkhat a hmunah a tlawh dawn a ni.