No.7912/2020-2021
Lawngtlai, Vau thla ni 24, 2021: Vawiin khan Lawngtlai District Level Committee on Disability chu Persons with Disabilities (PwD) Commissioner Pi Vanlaldiki Sailo hovin Lawngtlai DC Conference Hall-ah an thu khawm.
He hun hmanpuitu Pi Vanlaldiki Sailo chuan rualbanlo kan tihte hi sawrkar chuan a ngai pawimawh chho zel a, an tan ruahmanna leh hamthatna tam tak siamin, sawrkar hna lak chungchangah pawh rualbanlote tan hian 4% zet a dah hrang hial tawh a, sikul admission tihnaah pawh 5% hial a dah tawh bawk a ni, a ti a. Rualbanlote chu hmusit leh thlauhthla mai lo va, an tana nun khawchhuah theihna tur kawng kawhhmuhtu nih tum theuh zawk tura kal khawmte chu sawmin, rualbanlote tan ka awm ti zel turin a chah nghal bawk.
Vawiin thut khawmah hian rualbanlote tana Samagra Shiksha , Lawngtlai District hma lakna leh Social Welfare Department hma lakna te ngaihthlak niin, hma lak tulna leh kal zel dan turte sawi ho nghal a ni.
Social Welfare Department atanga report tar lan a nih dan chuan, Lawngtlai District-ah rualbanlo naupangte tan anganwadi centre tinah Take Home Ration (THR) kalpui niin, ration pek vek an ni a. Indira Gandhi National Disable Pension Scheme kalpui ni bawkin, he scheme hnuaiah hian tun dinhmunah Lawngtlai District chhungah rualbanlo, kum upa lam mi 60 hnenah thla tin tanpuina Rs 400/- pek thin a ni.
Samagra Shiksha, Lawngtlai District report atanga a lan danin, tun dinhmunah Lawngtlai District-ah rualbanlo/vohbik, sikul kai mek mi 685 (mipa 366 leh hmeichhia 319) an awm a ni.
He thut khawm hi Lawngtlai Sub-Divisional Officer (Sadar) Pu V. Lalruatliana'n a kaihruai a. A kaihhnawih department hrang hrang atangin member-te an tel bawk.
