No.7911/2020-2021

Lawngtlai, Vau thla ni 24, 2021: Vawiin kha World Tuberculosis (TB) Day niin, Lawngtlaiah chuan DC Conference Hall-ah he ni pual hian hun hman a ni.

Lawngtlai District Chief Medical Officer (CMO) Dr LP Malsawma kaihhruai he hun hmanah hian Lawngtlai Sub-Divisional Officer (Sadar) Pu V. Lalruatliana chu Khuallian a ni a. Khuallian chuan ngawr natna (TB) chu tun hmain natna hlauhawm tak, enkawl dam theih loh anga ngaih ni thin mah se, khawvel thiamna sang zelah a hun taka a nih dan tur taka enkawl chuan natna enkawl dam awlsam tak a ni ta tih sawiin, ngaihthah leh damdawi ei that loh erawh chuan hriselna leh nunna atana thil pawi tak thlen thei a ni, a ti a. TB vei hmuh chhuah leh enkawl dam kawnga District hmahruaitu ni thei turin ASHA, anganwadi worker leh thawktu dang kal khawmte chu inpekna thuk zawk nena thawk turin a chah a ni.

He hunah hian Senior Treatment Supervisor Pu James Zarzoliana hnen atangin an hma lakna leh hlawhtlinna (performance & achievement report) ngaihthlak a ni a. District DR-TB & TB-HIV Coordinator Pu H. Vanlalpeka hnen atangin ngawr natna chungchang a lem nena sawifiahna ngaihthlak a ni a. RNTCP hnuaia ngawr natna enkawl dam tawh, TB champion Bethsy L. Chinzah hnen atangin TB damdawi a ei dan leh enkawl dam a nih chungchang ngaihthlak a ni a. District PPM Coordinator Pu K. Lalnunsanga'n lawm thu sawiin, hun khar a ni.

Kumin World TB Day thupui atan hian: "Hun tha a liam zel e" (The clock is ticking) tih hman a ni a. Vawiina Lawngtlaia hun hmanah hian Lawngtlai khawpui chhunga ASHA zawng zawng, anganwadi-a thawktu zawng zawng leh MSACS, NCD leh NTCP hnuaia thawktute an tel a ni.