No.7910/2020-2021

Hnahthial, 24th March, 2021: Vawiin chhun khan Rural Development Minister Pu Lalruatkima'n  Hnahthial District DRDA Office, Chanmari Veng-ah a hawng. RD Joint Secretary Pu CC Lalchhuangkima leh Rural Development Department hotu dangte bakah Hnahthial District sawrkar official-te, tlawmngawi pawl aiawhte leh khawtlang hruaituten he hunah hian an tel a ni.

Hnahthial DRDA Office hawnna inkhawm Hnahthial PHE Office tualzawla neihah Rural Development Minister Pu Lalruatkima chuan Mizorama DRDA office sawmpakhatna ni tura Hnahthial District DRDA office hawn a ni ta chu District mipuite a lawmpui thu a sawi a. RD Department chu mipuite nena in ngheng tlata, hma la tlang reng an nih angin Hnahthial DRDA office hnathawkte pawh District mipuite nen thawhhona tha tak hnuaia hma an lak tlan a beisei thu a sawi a, kawng hrang hranga lo finchhuaha thurawn te lo pe thin turin kalkhawmte a chah a ni. Department hrang hrang official kalkhawmte pawh thawhho puiah sawmin RD Minister chuan a theih apiangah hmasawnna hna kalpui hova, convergence a hmalak tlan puiah a sawm a ni.

India rama Flagship programme lian ber RD Department enkawl MGNREGS chungchang pawh sawiin RD Minister chuan sawrkar official, khawtlang hruaitu leh mipuite thahnemngaihna leh inpekna zarah Mizoram chu India rama he Scheme kalpui tha berte zing ami niin kum 2 kalta chhung khan mipuite tan ni 100 inhlawhna siam zat zat a ni , a ti a.  MGNREGS hnuaiah hian tun dinhmunah Mizorama daily wage rate chu 225 ni mekin hei hi ti pung turin sawrkar laipuiah thlen leh mek anih thu RD Minister chuan a sawi. RD Department hnuaia scheme leh hmalakna dang PMAY Gramin leh Rurban cluster lamah te pawh zau zawka hmalak zel anih tur thu sawiin RD Block siam belh tura hmalak mek anih thu a sawi bawk.

Vawiin program hi Hnahthial DC Pu H.Dolianbuaia'n kaihruaiin Pu Lalneihthanga Colney, BDO Hnathial in Technical Report a pe a. RD Joint Secretary Pu CC Lalchhuangkima pawhin thusawina hun hmangin Pu K.Lalrohlua,PD DRDA lunglei chuan lawmthu sawina hun a hmang bawk.

Hnahthial district DRDA office tharah hian APO, AE, AO leh JE telin staff 20 velin bul an tan dawn a, Hnahthial DC Pu H.Dolianbuaia chuan Project Director hna hi a kawp rih dawn a ni.

Hnahthial District DRDA office hi  Hnahthial Chanmari venga BNRGSK Hall chu thuam thain bultan a ni a. April ni 1, 2021 atangin office hi dawr theih a ni ang. Hnahthial DRDA Office hi RCC building niin a dung zawng 48.3 feet leh a vang zawng 24 feet niin mipui inthiarna, in chhung leh pawn rawng hnawih that, room partition thar, electric wiring thar, a building hungna etc siam a ni.

Minister leh amah zuitute hian Hnahthial Districta sawrkar pisa sakna hmun tur leh ruahmanna siam mek te a hmunah kalin an enfiah bawk a ni.