4415/2024-2025

Dated Aizawl, the 24th February 2025: Vawiin khan CM Office-ah Chief Minister Pu Lalduhoma hmaah India Meteorological Department, Ministry of Earth Science leh Directorate of Science & Technology, Government of Mizoram te chuan Directorate of Science & Technology hmunhmaa IMD centre dinna tur inremna (Memorundum of Understanding) an ziak.

MoU hi Directorate of Science & Technology aiawhin Chief Scientific Officer Pu H. Lalsawmlianan a ziak a, IMD aiawhin Pu Sudheer Kumar Dwivedi, Director, IMD in a ziak a ni. 

Thu tawi sawiin Chief Minister chuan, tun hma chuan sik leh sa a dik a, kan pi leh puten ruah sur hun te, thli tleh hun te an nei thliah thliah a, an hming te an phuah a, an beisei hunah tak a lo thleng zel thin. Vawiinah erawh chuan chung kan pi leh pute lo sawi lawk theih sik leh sa hun bite chu an mumal hlei thei tawh lo va, science thiamna hmanga kan lo inbuatsaih loh chuan kan thil hriat a dik hlei thei tawh lo. Vawiina kan MoU ziak hian chu mi kawngah chuan nasa takin min tanpui dawn a ni, a ti.

MoU angin Beraw Tlanga Science & Technology Centre ah IMD Centre din a ni ang a,  IMD hian Mizoram sawrkar hnenah Meteorological data a pe thin ang. Weather forecast leh report dik leh rintlak zawk a neih nan hman a ni dawn a ni.

MoU ziak lai hi Director General of Meteorology (IMD) Dr. Mrutyunjaya Mohapatra pawhin Video Conference hmangin a rawn zawm a. Chief Minister Pu Lalduhoma chungah leh Mizoram sawrkar chungah lawmthu a rawn sawi a ni. 

MoU ziak inkhawm hi Pu Vanlaldina Fanai, Commissioner & Secretary to CM chuan lawmthu sawiin a khar a ni.