DIRECTORATE OF INFORMATION & PUBLIC RELATIONS, Government of Mizoram, India

4414/2024-2025

Lunglei, 2025 Ramtuk thla ni 24: Vawiin khan Lunglei South bialtu MLA Pu Lalramliana Papuia leh Lunglei West bialtu MLA Pu T. Lalhlimpuia te kaihhruaina hnuaiah Pradhan Mantri Gram Sadak Yojana (PMGSY) kal tlanga Luangmual leh Vaisam inkar kawng siam hna thawh mek chungchang chu Lungleia Public Works Department (PWD) hotute, hna thawktu VRS Construction te, Lunglei Sub-Headquarters YMA hruaitute leh SYMA hnuaia Vigilance & Monitoring (V&M) Committee hruaitute nen PWD Lunglei Circle Superintending Engineer (SE) office chamber-ah sawi ho a ni.

He ṭhut khawmah hian tun hnaia he lai kawng siam chungchanga Vaisam Branch YMA thu chhuah leh thuthang awm hrang hrang chungchanga thil awm dan sawi ho a ni a. Lunglei South bialtu MLA Pu Lalramliana Papuia chuan bialtu MLA a nih anga he lai kawng siam hna hi a vei thu leh a en thlithlai reng thu sawiin, duhthusam lo lai a awm pawhin ral aṭanga intawng mai lovin bialtu MLA hnenah thlen ni se, ṭha taka sawi hova hma lak zui a inhuam thu a sawi a. Hemi kawng siam chungchangah hian department leh contractor-te chu uluk leh fimkhur taka hma la zui tura chahin, khawtlang hotute leh mipuite nen pawh inpawh tlang taka thil sawi ho va, hna ṭha a awm theih nana thawk ho zel turin a chah a ni.

Lunglei West bialtu MLA Pu T. Lalhlimpuia pawhin tlang taka thil sawi hona aṭangin inhriat thiamna leh thawh hona ṭha a awm ṭhin tih sawiin, department leh contractor-te chu mipuite ṭhahnem ngaihna rilru hre thiam a, lung lohva la mai lo tur leh ṭha taka hna thawh zawh a nih theih nan theih tawp chhuah zel turin a chah a ni.

He hunah hian Luangmual-Vaisam kawng siam mek dinhmun leh thlen chin te sawi ho niin, ṭha tak leh a hun taka kawng siam hna thawh zawh a nih theih nana ruahmanna te sawi ho a ni bawk a. February ni 26, 2025 (Nilaini)-ah Lunglei Sub-Headquarters YMA hruaitute huaihawtna hnuaiah PWD hotute, contractor lamte, Vaisam leh Chithar khawtlang hruaitute leh YMA hruaitute nen kawng hi a hmunah enfiahin, thil nih dan leh hma lak zui dan turte sawi ho ni se, tih a ni.

Luangmual aṭanga Vaisam inkar PMGSY kawng sial mek hi kilometre 28-a thui a ni a. A hna hi composite work, kawng laih aṭanga a luan (flexible pavement) thleng thawh tur niin, kawng siamna tur sum agreement amount hi ₹ nuai 4,518.74 a ni a. March 2025-a thawh zawh tura ruahman niin, (ni 05.02.2025 thlengin) hna hi 97.13% thawh tawh a ni a. Defect liability period hi kum 5 niin, kawng siam hna an thawh zawh vek hnuah pawh kum 5 chhung chu contractor-te'n a chhiat thulhah mawh an la phurin, an thawm ṭhat zel a la ṭul dawn a ni.

Attachment