Mizoram Sawrkarin a din, Administrative Reforms Committee (ARC) chuan vawiin khan Mizoram House-te leh Mizoram Secretariat Office a File kal dan an zirchianna Report Volume 1 Mizoram Houses & Streamlining of File Movement in Mizoram Secretariat tih chu Chief Minister Pu Zoramthanga hnenah an thehlut. 

Report-ah hian India ram khawpui hrang hrang New Delhi, Kolkata, Guwahati, Shillong, Silchar, Mumbai, Bengaluru leh Vellore a Mizoram Sawrkarin Mizoram House a neihte zirchian a ni a. Mumbai, Bengaluru leh Vellore tih loh chu a hmunah kalin an en vek a, rawtna hrang hrang an siam a. Vellore Mizoram House erawh Mizoram Presbyterian Church (Synod) kutah Mizoram Sawrkarin a enkawl hna a dah avangin rawtna (Recommendation) an nei lo thung. 

Hmun hrang hranga Mizoram House ahte hian ARC hian House a hnathawk (Manpower) te, post then khat outsource theih tur ngaihtuah te, administration te, khum leh mikhual thlen dan te, a building-te bakah Kitchen enkawl dan thlengin an zir a. Tun aia mumal zawka an kal theih dan tur leh Sawrkar tan pawha zangkhai zawka kal dan bakah tihchangtlun dan tur thlengin rawtna an Siam a ni. 

Hemi bakah hian ARC hian Mizoram Secretariat chhunga File kal dan an zirchiang bawka. Tuna File kal mek dan hi mipuite tan leh sawrkar tan pawh hun khawhralna tam tak awm nia an hriat avangin awlsam zawk leh Sawrkar tana him tur siin tawi zawka File kaldan tur rawtna an Siam bawk a ni. Mizoram Sawrkar chuan ARC hi May ni 9, 2019 khan a dinna Notification tichhuakin Mizoram sawrkar hnuaia Department hrang hrangte zirchiang turin an tih tur bituk fel tak a siamsak a ni. ARC ah hian Chairman leh Member 3 (Mizoram Sawrkar hnuaia Secretary post 10 chelh tawhte) leh Committee Secretary pakhat an awm a, chungte chu:

Chairman: Pu Lalngheta Sailo, IPS (Rtd.)

Member te: 1) Pu Nghaklianmawia, MCS (Rtd.)

2) Pu Lalthansanga, MF&AS (Rtd.)

3) Pi K. Vanlalrawni, MSS (Rtd.) 

Secretary Lalrinsanga, Jt. Secretary DP&AR (GSW) ARC hian Mizoram Secretariat Addl. Building Room No. 22 chu supporting Staff te nen office atan an luah a ni.