Vawiin khan Chief Minister’s Conference Hall-ah Chief Minister Pu Lal Thanhawla leh Sawrkar senior officer engemaw zat hmaah Aizawl DC Pu Kanan Gopinathan chuan Aizawl DC Office leh Information Communication Technology Department mithiam ten Chhiatrupna a thlen thulha smart phone-a Application hman theih an buatsaih ‘Aizawl District Disaster Management Application’ ADDMA App hnathawh dan tlangpui chu presentation hmangin a hrilhfiah.

Aizawl DC chuan chipchiar takin ADDMA App hnathawh, a hman dan te leh hemi hmanga chhiatna hrang hrang a thlen palha mipui te rang taka chanchin hrilh chhawn dan te presentation ah hian a tarlang. ADDMA App hmang hian chhiatna a thlenin awlsam leh rang takin chhiatna a thlenna hmun leh a chanchin te District Emergency Operation Center leh Disaster lama mawhphurtute hnenah smartphone App hmangin mipui a hrilh thei a ni. He App ah hian Aizawl khawpui leh Aizawl District huam chhunga Disaster lamah mawhphurhna nei Zonal officer leh mawhphurtu dangte biak pawhna number te, GPS hmanga chhiatna a thlenna hmun hriattir leh a thlalak upload theihna te a awm a. Chhiatna a thlen palh a tih tur leh tih loh tur pawimawh te thalak hmanga entirna a awm bawk a, mipuiin chhiatna a thlen in a mawhphurtu te hnenah rang taka an hriattir theih dante awmin chhiatna a thlen a mi mangang te rang taka mawhphurtu te an hriattir theih dan te pawh a awm a ni. He App hi tun atanga hun reilo teah tlangzarh tur a ni a, chumi hnuah chuan mipui in an smartphone-a download in an hmang thei dawn a ni.

He App hi National Disaster Management Agency (NDMA) lam pawhin an rawn ngaihven hle a, khawchin chhinchhiahtu Indian Metrological Department nen pawh he App hi tangkai zawka mipui te an hman thei nan, thawhpui tum a ni bawk.