3185/2023-2024

Dated Aizawl, the 28th December, 2023: Vawiin khan Mizo Students' Union hruaitute chuan Project Mizoram( Free Medical Equipment Supply) bungrua ram pawn atanga an dawn engemawzat chu a tul apianga sem chhuah turin Chief Minister Pu Lalduhoma hnenah an hlan.

Chief Minister chuan, MSU ten inenkawlna hmanrua engemawzat an pek avanga lawmthu sawiin, tangkai leh daihzai taka lo pek chhuah a tum tur thu a hrilh a ni.

Hmanraw inhlanna CM office tuala an an neih zawh hian Chief Minister pisaah inkawmna an nei zui a. Pu Samuel Zoramthanpuia, President MSU chuan Project Mizoram tlangpuii sawiin, Mizoram a Burma unau raltlan awm te leh Mizo mipuite puala medical equipment a thlawna sem chhuah a nih theihna tur hian Kum 2022 atang tawh khan Project lo kalpui tawh a. Mizo Students' Union(MSU) leh khawvela medical equipment sem chhuaktu lian ber Project CURE, United States of America te, Myanmar Refugee Relief Committee- Mizoram te, R2P Myanmar Way te, BN Hospital & Research Centre Mizoram te, Arizona Falama Christian Church te, Chin Baptist Association te leh North America te tangho project siam, a taka kalpui mek zel a ni, a ti. Project Mizoram bungruate hi First Container leh Second Container-ah te then niin First Container hi nikum 2022 khan Mizorama Community Health Center (CHC) leh Primary Healthcare Center (PHC) hrang hrangah sem darh a lo ni tawh a. Project–Mizoram 2023 second container-ah hian damdawi lam bungrua chi hrang hrang bakah manna pack (food package) a awm a,Tun Project–Mizoram a thawh hnihna hi ‘Humanitarian Aids’ tia vuahin kan unau Burma, Bangladesh, Manipur-a chengte an ram buaina avanga Mizoram rawn belte’n an mamawh ang zelin camp hrang hrangah a ṭul anga sem darh a lo ni tawh bawk a ni.

He huna tel Myanmar Refugee Relief Committee Chairman Pu Vanlalchhana pawhin thusawiin, kawng tinrenga Mizoram sawrkarin refugee te a lo tanpui thinnaah lawmthu a sawi a. US leh Europe ram hrang hranga Myanmar mi awmte aiawhin Chief Minister hi lawmpuina a hlan a ni.