3184/2023-2024

Dated Aizawl, the 28th December 2023: Vawiina Aizawl Municipal Corporation (AMC) Board of Corporators (BoC) meeting chuan AMC Revised Estimate (RE) 2023-2024, cheng nuai 11731.81 chu lawm takin a pawm a. BoC meeting chuan Corporators zinga MLA a tling thar Pi Baryl Vanneihsangi chu lawmpuina an hlan a, Mizoram State a Pu Lalduhoma kaihhruai Sorkar thar lo ding chu lawmpuina an hlan bawk a ni.

Aizawl Mayor Lalrinenga Sailo kaihhruai BoC meeting-ah hian Pu Lalringliana, Executive Corporators (Cash & Accounts) chuan Revised Estimate hi a pharh a, sawifiahna hun a nei nghal a. Kumtira Budget Estimate zat chu cheng nuai 11479 a nih thu te, Revised Estimate hi Budget Estimate aia cheng nuai 252 a a san thu a sawi a. AMC in a thawhchhuah te chu a pun zel thu leh hmasawnna lawmawm tak a nih thu a sawi a ni.

Mipui ten awlsam zawka online a Property Tax an pek theihna tur Property Tax Management Software (PTMS) peihfel a nih thu te, hei hian mipuite chhiah pek kawngah pawh awlsamna a siam an beisei thu te tarlan a ni.

Vawiina pharh tak AMC Revised Estimate - 2023-2024 ah hian budget atang 81% hi khawpui hmasawnna hrang hrang thawhna atan hman a ni tih tarlan a ni a. A bang 18.8% hi AMC inrelbawlnan - thawktute Officers & Staffs leh Corporator te hlawh leh hamthatna leh inrelbawlna te, Local Council lawmman atan te hman a ni. AMC sum hmanna lian zual tarlan te chu - Aizawl khawpui bawlhhlawh lakkhawmna atan te, tui leh a kaihhnawih atan te, Corporators Ward Development Fund atan te, Local Council kaltlanga vengchhung hmasawnna atana te, Street Light chhit man te a nih thu tarlan a ni. Aizawl Day 2024 hmanna tur atan pawisa dah a nih thu tarlan a ni bawk.

AMC hi mahni intodelh tur a nih avangin Central leh State Sawrkar sum a innghat mai lova tax leh thil dang a lakkhawm hmanga intodelh tura tih a nih thu AMC hotute chuan an sawi a. Chumi kawnga hmalakna a hlawhtlin zel thu leh financial year kalmeka a sum thawhchhuah pawh kumdang aia a tam thu leh cheng nuai 1001 a nih thu tarlan a ni a. Heng sum lutte hi AMC inrelbawlna leh Ward Development Fund atan hman a ni thin thu sawi lan a ni.

Financial Year 2023-24 chhungin Central Sawrkar atangin cheng nuai 6564 dawn beisei a ni a, State Sawrkar atangin cheng nuai 2324 dawn beisei a nih thu Budget RE-ah hian tarlan a ni.

Budget hi Corporators ten uluk taka an sawiho hnuah lungrual takin an pawm a, meeting hi tiamchin awm lova tihtawp a ni nghal a ni.