4031/2022-2023

Aizawl, 29.03.2023: 71st BN Mullik Memorial All India Police Football Championship 2022-23 a Mizoram Police an champion chu vawiin khan 1st Bn. MAP Ground, Armed Vengah a lawmna buatsaih a ni a. Chief Minister Pu Zoramthanga chu khuallian niin Home Minister Pu Lalchamliama chu khualzahawm a ni.

Chief Minister Pu Zoramthanga chuan All India Police te football intihsiakna a champion Mizoram Police football player te leh anmahni buaipuitu zawng zawng chungah a lawmpui thu a sawi a. Mizoramin state nihna a chan tirh a ramchhung mi tam takin Mizoram chungchang an hriat loh thin ngaihtuah chuan tunah foorball leh infiamna discipline hrang hrangah champion nihna kan chang fo ta chu thil lawmawm tak, Mizoram hmingthatna a nih thu a sawi. Chief Minister chuan ram leh mipui tana Mizoram Police te hnathawh leh hmalakna hrang hrangte sawilangin, an inpekna chungah lawmthu a sawi a. Mizoram chu thenawm ram nena ramri intawm a nih avanga dan phalloh hrang hrang tawlhluhna kawnga hman a nih dan te chumi do let a lo dan hna chu thil pawimawh tak a nih thu leh hengah hian Police pawimawhna a sawi a. Kil tin atanga hmun hrang hranga ruihtheihthil lut lo dang a lo do hneh tur chuan kan vai ?an a ngai a ni a ti a. Ruihhlo, zu leh sualna dang dang min hnukhniamtu chu huaisen taka kan sut a, eng bawih ah mah tang lo tura huaisenna leh tumruhna neih a pawimawh thu Chief Minister chuan a sawi a. Tumruhna chu mihring chawikangtu, hnehna thlen a, kan ram chawikangtu tur chu a ni tiin vawiina police champion-te lawmpui rualin damchhunga an hnathawhna leh an mimal nunah tumruhna vawng reng turin a duhsakna a hlan a ni.

Khualzahawm Home Minister Pu Lalchamliana chuan kum 2008 kha sports quota a police ah mi lak hnuhnun ber a nih thu leh, chuti chunga kum sawm a chuan hnu pawha India ram pum police zinga football champion a ni thei chu thil ropui tak nia a hriat thu sawiin player te chungah lawmthu a sawi. Police Football team te hlawhltinna chu tawp mai lova, a aia tha leh zuala hma sawn zel tura a duhsakna a hlan a. Team tha lehzual nei tur chuan infiammi mithar lakluh belh pawimawh a tih thu sawi telin, sawrkar sum leh pai harsatna tawh karah recruitment kalphung tlem tih danglam tak behchhanin beiseina a neih thu a sawi bawk. Home Minister chuan Mizoram Police in tha taka hna an thawh thinah lawmthu sawiin, discipline pawh vawng tha a tih thu a sawi a. Chutihlai chuan Police nihna nena inhmehlo takin thenkhat zinga zu leh drugs avanga buaina tawh sawi tur awm leh zeuh chu pawi a tih thu sawiin, insiamthat pawimawh a tih thu a sawi a. Ruihtheihthil avanga buaina chhuak sawi tur awm chu pawi a tih thu sawiin, police personnel te heng lakah hian fihlim hram tum turin a chah a. Home Minister chuan force lam chu sorkar tan sum lalut tura ngaih a nih loh laiin Mizoram Police 3rd IR Bn. te Assam a zuk awm avanga pawisa vbc 73 chuang Mizoram sawrkar pek a nih thu te, hun rei tak SBI tan venhimna an pek man tlingkhawm vbc 8 chuang sawrkar pek a nih thu te a tarlang bawk.

DGP Pu Devesh Chandra Shrivastava chuan kalkhawmte lawmna thu sawiin, Mizoram Police in ram pum huapa Mizora. Police in hlawhtlinna an chan hrang hrangte a sawi a. IGP (L&O) Pu Lalbiakthanga Khiangte, MPSCCB Chairman ni bawk chuan report a pe a. Mizoram Football Association aiawhin Pu Lalnghinglova Hmar atangin thusawi ngaihthlak a ni bawk a.

Khuallian hian player te lawmpuina a hlan vek a. DIG (Hqrs.) Pu Neihchungnunga chuan lawmthu sawiin hun a khar a ni.

71st BN Mullik Memorial All India Police Football Championship 2022-23 hi March ni 11-21, 2023 chhung khan Sri Nagar ah neih a ni a. He tournament hi All India Police Sports Control Board in a buatsaih ?hin a ni. Tun hma in Mizoram Police chuan kum 1993 (Aizawl), 1996 (Shillong) leh 2012 (Patna) ah te pathumna dinhmun an lo hauh tawh thin a. Kumin hian team 34 chhuakin, Mizoram Police chuan ni 13 khan an match hmasa ber khel in Gujarat Police chu 9-1 in an hneh a. Ni 15 ah match pahnihna Jharkhand Plice chu 5-1 in hneh lehin, ni 16 khan Madhya Pradesh police chu 6-0 an hneh leh a. Ni 17 ah Assam Police chu 2-0 in an hneh a, ni 18 ah BSF nen intumin 2-1 in hnehna an chang a. Semi final ah Punjab Police tumin 2-1 in an chak a, final match ah 1-0 in Assam Rifles an hneh leh a ni. Tournament chhung hian Mizoram Police goalkeeper Const. F. Lalmuanawma chu Best Goalkeeper a thlan a ni bawk.