4030/2022-2023

Khawzawl, 29th March 2023: Vawiin khan Khawzawl Town Planning & Development Committee Meeting hmasa ber chu an Chairman Pu Tawnluia, Deputy Chief Minister kaihhruaina hnuaiah Khawzawl DC Conference Hall-ah neih a ni a. Khawzawl Master Plan buatsaih mek huamchin (Planning Boundary) tur te, Khawzawl khua-a mipui leh sawrkar department-te dinhmun zirchian dan tur te sawihoin, inrawnkhawmna hun hlawkthlak tak hman a ni.

Deputy Chief Minister Pu Tawnluia chuan Khawzawl chu hun rei tak ‘notified town’ ni tawh mahse, District khawpui a lo nih takah chuan mumal taka khua a than theih nan Town Planning & Development Committee din a nih tak thu a sawi a. He mi kawnga hmalakna te chu ngaipawimawh tur leh mirethei zawk te ngaihtuah tel chunga ruahmanna siam turin member kalkhawmte chu a chah a ni.

Khawzawl DC Pu CC Lalchhuangkima chuan Khawzawl khua chu khaw nuam tak ani tiin, a than chhoh zel dan tur ruahmanna (plan) pawh siam hun lai tak ni a a hriat thu a sawi a. UD&PA Joint Director (Town Planning) Pu Zoduailova Zote pawhin thusawiin khawpui hi ruahmanna mumal awm lova a thanlen chuan mipuite vekin an tuar thin a, mumal taka ruahmanna siam hi a tul a ni, a ti bawk.

He hunah hian Pi Lalthanghliri Pautu, Assistant Director (Town Planning), UD&PA chuan Powerpoint presentation hmangin Khawzawl Master Plan buatsaih tura hmachhawp hrang hrang te sawifiahna hun a nei a ni.

Vawiina Khawzawl Town Planning & Development Committee thukhawm chuan Khawzawl Planning Boundary 45 sq.km ni tura Town & Country Planning Office (TCPO), UD&PA Department in ruahmanna a lo siam chu a hmun ngeiah UD&PA leh Khawzawl VC ten lo zirchiang leh se tiin an rel a. Master Plan siam tura Khawzawl mipuite dinhmun zirchianna kawngah Village Council te nen tanghoin, surveyor thlanchhuah dan tur leh training pek hun tur sawiho a ni a. TCPO-in Khawzawl khaw chhunga Department hrang hrang te hmalakna zirchianna tur ‘Secondary Survey Form’ a siam chu thehluh hun tiamchin an ruat bawk a ni.

Vawiin meeting-ah hian Khawzawl khaw chhunga sawrkar department hotute, Khawzawl VC, YMA leh MJA aiawhte bakah Khawzawl prominent citizen te an tel a ni.