No.3829/2021-2022

Aizawl, the 27th January 2022: Vawiin khan Chapchar Kût Organising Committee chu an Chairman Chief Minister Pu Zoramthanga hovin Assembly Annexe Conference Hall-ah kumin Chapchar Kut (March ni 4) lawm dan tur relin an thukhawm.

COVID-19 hrileng hluar thar leh avangin mipui tam tak pungkhawm a lawm a remchan loh thu sawiho a ni a. Nikum 2021 a TV leh internet kaltlanga mipui chhim theih tura Live/Virtual programme buatsaih tak ang khan kuminah pawh lawm leh mai se, tiin an rel a. Kût puala souvenir siam thin, nikum a tih tak loh chu kumin ah chuan siam leh ngei ni se tih a ni bawk.

Kumin Kût thupui tur te, signboard leh gate siam chungchangte, media lama hmalak leh programme hman dan tur kimchang zawk leh tul dangte chu Programme Committee in a lo ngaihven zui tura dah a ni.

Vawiin meeting-ah hian Art & Culture Minister Pu R. Lalzirliana leh organizing committee member dangte kim takin an tel a ni.