Vawiin chawhnu khan Thenzawl Joint YMA Hall-ah Commerce & Industries Department hnuaia beneficiary te hnena NLUP tanpuina semna  chu Chief Minister Pu Lal Thanhawla ho a neih a ni.

NLUP chu tanpuina rintlak, mirethei te, inhlawhfa te, eizawnna mumal neilo te, rahbi tleu tawh leh mi khawsak harsa hrang hrang te zawngtu a ni tih Chief Minister Pu Lal Thanhawla chuan a sawi a. NLUP hmalakna dik taka kalpui tu,  hlawhtling tura puih la ngai te chu NEDP tanpuina hmanga chawmdawl an ni ang a ti.

Thenzawl leh puantah chu mitin in an hre kawp tawh a. Hmasawnna tur lai erawh a  hmawrbawk uluk a ni a ti. Ram pawn lam khualtha leh mi dang dang te duhsakna atana pek ngam loh tur khawpin iptechei, khumbeu leh Mizo kutchhuak uluk tawklo te siam a ni chu in enchian ngai lai a ni a ti a. India bakah khawchhak ramah te thlengin Mizo puanchei leh handloom kutchhuak te chu hriat a hlawh a, hralh a kal lehzual nan handloom kaihnawih thil te chu uluk zawka siam leh  hmawr bawk a ngai a ti.

Thenzawl leh a chhehvela Mizo pipute sulhlu hlui awmna - Chawngchilhi Puk, Tuirihiau, Vantawng khawhthla panna kawng, Tualvungi Thlan leh a dang te step, inbualna leh thildanga an chei chu a vanduaithlak a ti a. Mizo pi leh pu sulhlu hmuhchaktu khualzin te chuan hmanlai anga sulhnu hlui te a nih ang anga hmuh an chak ber a. "Kan pipute sulhnu hlui department official te sum duh vanga sum siamna atana an suasam thin hi" khawtual mipui ten an phal tur a  ni lo a ti.

Chief Minister chuan kawngpui, vantlang hmun leh sumdawnna hmun atana ram awl zau zawk ken thiam Thenzawl bakah Mizoram mipui ten kan zir angai a ti a. Hmasawnna kawngah chak zawka ke pen turin  kuttlinglova sum lakluh ching te dodal a hun a; khawhawi zau zawk leh hmathlir thui tak nen hmasawnna tura hmalakna atan inphal tlan a huna ti.

Thenzawl a NLUP tanpuina beneficiary te  semna hun hi Pu J.Hmingthanmawia, Director, Commerce & Industries in a kaihruai. Principal Adviser to CM Pu RL Rinawma leh Serchhip Bawrhsap Pi Sangchin Chinzah ten thusawina hun an hmang a. Thenzawl a NLUP beneficiary tanpuina dawngtute te hi an vaiin mi 307 niin handloom trade thlang deuh vek a. Heng  ho hnenah hian NLUP tanpuina sum Rs.79,31,070/- pekchhuah a ni.