Vawiin khan State Board for Wildlife chu an chairman Chief Minister Pu Zoramthanga hovin CM Conference Hall ah meeting vawi riatna neiin an thukhawm. He meeting ah hian EF&CC Minister Pu TJ Lalnuntluanga, MLA Pu Lalrinsanga Ralte leh Dr. F. Lalnunmawia te leh member dangten nangcha humhalh kawnga thu pawimawh hrang hrang rel ngai te an sawiho.

Vawiin meeting ah hian inthemthiamna atan silai hmanga nungcha kap an awm thin chu pawi a tih thu Chief Minister chuan sawiin, hemi kawngah hian mipui kan harhchhuah tul a tih thu leh inhrilhhriatna neih pawimawh a tih thu a sawi.

Meeting ah hian PHED in Aizawl a Alternate Gravity Water Supply Scheme kalpui an tum chuan tuikhuah awmna tur chu forest reserve area chhunga awm anga a lan avangin clearance dil a nih dan te sawiho a ni a. He project ah hian tuikhuah awmna tur chu Hualtu khaw daia Dilzawl hmun, Tawi Forest Reserve hnuai a ni. Heng bakah hian Dampa Tiger Reserve a Indo - Bangladesh border fencing leh patrol road siam avanga saving amount tlingkhawm tangkai taka hman chungchang te, Thorangtlang Wildlife Sanctuary chhunga Bharti Airtel in Communication Tower dah tura rawtna an siam te leh adangte sawiho a ni a. Communication tower dah chungchangah hian chipchiar zawka zirchian leh phawt ni se tih a ni.