Irigation & Water Resources Minister Pu C. Lalrinsanga hovin vawiin khan Chief Engineer’s Committee Room, I&WR Office, MINECO ah National Hydrology Project leh Japan International Cooperation Agency (JICA) kaltlanga Mizoram tana hmalakna hrang hrang I&WR Department officer ten an thlirho.

Vawiin review meeting ah hian National Hydrology Project kalpui nan Mizoram tan cheng vaibelchhe 31 ruahman a nih thu leh Mizoram chu kum kal mekah hian hmarchhak state Implementing Agency zingah titha ber a nih thu tarlan a ni a, India ram pum state sawrkar department zingah a ti tha 8-na ni bawk. Mizoram tana ruahmanna 'Project Implementation Plan' (PlP) kalpui that avangin cheng vaibelchhekhat dang pek belh a ni bawk tih tarlan a ni. NHP hi kum riat chhunga thawh tur niin kum 2024 hian a tawp ang.

India sawrkar chuan ram hmasawnna tura ruahmannate tihlawhtling tur chuan kan Water Resources Information hriatchian hi thilpawimawh berte zing ami a ni tih hria in National Hydrology Project (NHP) hi MoWR (tuna Jal Sakti) chuan a duang chhuak a. National Hydrology Project atan hian Ministry of Jal Shakti-in World Bank pawisa leh Ministry pawisa hmangin Implementing Agency hnenah 100% central funding-in a pe a ni. Kum 8 chhunga (2016-17 to 2023-24) zawh tura ruahman a ni.

National Hydrology Project-in a tum ber chu ram hruaituten ram hmasawnna an rel chi hrang hrangte tihlawhtling tur leh chak leh dik zawka thuthlukna an siamtheih nan ram pum lui tui neihzat (river discharges, rainfall), sik leh sa chet vel dan te tunlai thiamna sang ber hriatna leh hmanruate hmanga rualkhai taka hriat nghal zung zungna tur chhawpchhuah leh hetiang lam khawihtu agency te tih changtlun a ni a. Mizoram tan hetianga data lakkhawmna hmanrua 'Hydromet Station' dahna tur hmun 58-ah ruahman a ni a. Heng hmanruate hi ramchhunga siam a nih loh avangin, hmanraw tha ber kan neih theih nan hmarchhak state, Assam tih loh zawngte 'Hydromet equipment' tur Central Water Commission (CWC) kaltlangin pek an ni dawn a. Chung data lakkhawm chu State Water Resources Information System (State WRIS) ah leh India WRIS ah a in chhungkhawm ang a, mithiamten a dik tih an finfiah hnuah a mamawh tute hman turin dah thin a ni ang. He project hi hlawhtling taka kalpui a nih chuan Mizoramin Water Resources lamah data rintlak a nei ve tawh ang a, department hrang hrangin an hmang tangkai thei tawh dawn a, dan siamtu ten tui hman dan chungchangah thutlukna dik leh fel an siamtheih nan an hmuh theihin engkim a awm tawh dawn a ni.

Tuilianin mihring nunna a suat leh bungraw tihchhiatte a tlem theih nan Flood Early Warning System siam tum a ni a. A bul tan nan Tlawngluiah he warning system hi dah tum a ni bawk. He Project hnuaiah hian Mizorama tuikhur leh lui tui kang mek te ven dan leh tuihna tihpun dan zir a ni ang a, kan lo neih danin lui tui a tihbuai dan leh lei tuihang a lak dan systematic study neih a nih hnu ah leh lei chung hang luangliam tur engtia dan tur nge tih leh khawilaia dan tur nge tih a zirchian hnu ah sawrkarah rawtna thlen a ni dawn a ni.

Mizoram puma 'Water Security' a awm theihna turin mithiam ruaiin zirchian a ni dawn a, hmalak dan tur leh tui sector hrang hrangin an hmandan tur, lui khuah na lai tur leh a hmandante a tha tur ang berin ruahmanna siam a nih hnu ah sawrkarah thlen a ni bawk ang.

Japan International Cooperation Agency (JICA) kaltlanga hmalakna pawh thlirho niin JICA hian kum 2013 leh 2015 inkar khan development study neiin Mizoram agriculture in hma a sawn zel theih nan 'Master Plan' a duang chhuak a. He Master Plan ah hian ei leh bara 50% aia tlem lova kan intodelh theih nan a hmalak dan tur duan a nih bakah Agriculture sector ah kum tin 4% tal a than tir tum a ni.

Master Plan hi tha taka tihhlawhtlin a nih theih nan kum 5 awh tur, Technical Cooperation Project, 'The Project on Capacity Enhancement for Sustainable Agriculture and Irrigation Development in Mizoram' buatsaih a ni a. He project in a tum ber chu Mizoramin innghahna tlak agriculture ngelnghet a neih theih nana Japan thiamna Mizoram sawrkar hnathawkte leh loneitute hnena hlanchhawn a ni. Mizorama hmalakna tur RD Block pali - Bilkhawthlir (Kolasib District), Aibawk (Aizawl District), Serchhip (Serchhip District) leh Champhai (Champhai District) te thlan niin, tunah hian 1st Pilot Project chu khaw 4 ah kalpui mek a ni a. 2nd Pilot Project pawh April, 2020 a tan turin inbuatsaih mek a ni.

TCP ah hian loneitute ngaihdan leh an mamawhte a zirin 'Plan' siam thin a ni a. Block level a line department officer hrang hrang ten an thiamna te thawhkhawmin 'Annual Activity Plan' an siam thin a. He kalphung thar, 'New Method of Approach' hi project tawp a JICA in Mizoram an chhuahsan hnu ah pawh Mizoramin kan hman chhunzawm theih tura buatsaih tum a ni.

TCP nen a kalkawpin project dang, 'Land & Water Resources Development and Management Project for Livelihood Improvement in Mizoram', kum 7 chhung awh tur chu duan mek ani bawk.

I&WR Minister Pu C. Lalrinsanga chuan I&WR department a thawktute chu an taima in tih tak takna nen an thawk thin a ni tih hun reilote chhung chauh an la thawhho chhung hian ahria tih sawiin, hmalam hun a eng hle a ni a ti a, lawmawm a tih thu a sawi a ni. An hmalakna leh hmachhawpte chu Mizoram tana pawimawh tak a nih avangin thla thlah lo turin officer te a chah a, thiamna sang zawk hmanga hmanraw changkang leh tunlai ber berte nen hmalak a ni tur chu phurawm a tih thu sawiin Mizoram tui dinhmun diktak hriat theih a nih hunah an hnathawh tangkai zia kan hre deuh deuh dawn a ni a ti a, loneitute harsatna sutkian a nih bakah luidung nungchate, thlai leh ramngawte, lui humhalh kawngahte, tuilian laka inven nan te pawh tangkai tur a nih thu  a sawi a. Mipuite hnenah an hmalaknate zirtir a hrilfiah kawngah tan nasa lehzuala la turin officer kalkhawmte a chah bawk a ni.