Minister of State Pu K. Lalrinliana, Kolasib bialtu MLA nibawk chuan vawiin khan Bairabi Zophai a hnamdang ten Mosque sak mek leh state pawn atanga mihring rawn lut Covid-19 an veil eh veiloh endikna screening point a tlawh.

Pu K. Lalrinliana chuan Mosque sakna a tlawh hian a hmuna lo awm te chu kokhawmin Mosque sak mekna hmun chu Mizoram chhung a nih avangin kawng engkim ah Mizoram Sorkar thuchhuak chauh ngaichang thin tur leh lungawi loh avanga kawngpui dang tawh lo turin a hrilh a, mizote tana harsatna siam tawhlo turin a hrilh a ni. Mizoram chhung anih vangin ILP neilo tan Mizoram chhung ah awm theih a nih loh thu leh ILP an neih loh avang a harsatna an tawk a nih pawhin anmahni thiamloh a nih tur thu a hrilh. Buaina awm thut pawh a chechhuak nghal mai thei turin IR platoon khat nizan atang khan Zophaiah hian dah a ni bawk

Mosque a tlawh hnu hian tunlai hrileng, khawvelin a buaipui mek Covid-19 hrivei Mizoram chhung lo lut an awm leh awmloh enfiahna Bairabi a mi chu a tlawh a, Covid-19 laka mipuite an him theih nan sawrkarin theihtawp a chhuah a ni tih a sawi a. Bairabi rail station-a khualzinte endikna hmun tur pawh a tlawh nghalin, thawktute hian harsatna an tawh chi hrang hrangte an lo thlen bawk a ni. Minister chuan Sorkarin mipuite hriselna a ngaihpawimawh thu sawiin, Covid-19 hrileng mek lakah pawh chi-ai mai lovin mipuite kan fimkhurna turin inralrinna dar kan vaw mai chauh zawk a ni, a ti. Building thar sakna hmun tur te a en nghal a, hemi hnu hian Bairabi SDC quarters tur sakmek a tlawh bawk.

Kolasib Bialtu MLA hian Meidum khua a MLA Fund atanga hnathawh hrang hrang, Vengthar kawng PCC Flooring, English Medium School sakna tur hmun laih, Middle School sakna tur hmun laih leh Community Hall sak te a hmunah kalin a en a, hna tha taka thawh a nih vangin Bialtu MLA hi hnathawk tu te chungah a lawm hle a ni.