Chief Minister Pu Lal Thanhawla hovin vawiin khan a office conference room-ah Chapchar Kut thlirletna neih a ni.

Chief Minister chuan thuhma a sawiah, Chapchar Kut kan hman dan kha chanchinbu leh social media lamah sawiselna leh rawtna a lang chuai chuai na a, kan hman that ber kum anihna laite pawh a awm a ni a ti a.Sawiselna te hi duhthawhna vang niin a lang a, a lawmawm lamah ngai ila a ti a.Kan hman leh zel dan turah engtinnge tha zawk leh changtlung zawkin kan hman theih ang tih ngaihtuah a ngai a ni a ti. Sum hi duh ang tawk awm thei se changtlung taka kan hman theih a rinawm a ni a ti a. Naga ten Hornbill Festival an neihte nen kan khaikhin a ni mai thei tiin, hmang tha anga an lanna chu sum an ngah vang a ni mai a ti a. Sum a awm chuan thil tih a awlsam bik a ni a ti. Chief Minister chuan YMA ten Chapchar Kut ni a Mizo incheia inthuam te chu bus fare concession siam sak nise an tih chu tha a tih thu a sawi a. Thenkhatah kan Kut hman dan chu ‘rock concert’ ang mai nia an sawiah, Pu Hawla chuan ni khat lek chhunga engkim tih kan tumna lamah a chawhchawrawi chu a ni ber a ni a ti a. Hornbill festival ang deuhin ni 2 ah tal bithliah thiam ila kan ziaawm deuh a beiseiawm a ni a ti.

Review meeting-ah hian chanchinbu hrang hranga Chapchar Kut kan hman dan mi hrang hrang ziahte sawiho a ni a. Chung zingah chuan tleirawl zurui hmuh tur an tam tih te, western music rock concert ang mai tihte, Kut hlut tawklo an tam, kohhran pisa thenkhat te an chawl ve lo, Anthurium festival ah sum hman a tam zawk tihte, Dar lam telh ve ni rawh se tihte, venhimna a tlem, programme a nawi tihte, naupang Mizo incheia thuam tir, mahse a hruaitu in Mizo inthuam a ha velo a, hmuh a nuamlo tihte leh a dang thahnem tak sawiho a ni. A tlangpuiin kumin kan Chapchar Kut chu kan hmang tha thawkhata an hriatthu an tarlang a, a hmunhma erawhin min zo lo deuha an hriatthu an sawi bawk.

Heng sawihona engah hian Chapchar Kuta sum hman tur department tinin dah hrang tawh se an ti a, security lam tih chak tul tihte, kan kut neih ropui ber hi ngaihhlut nachang kan hriat lehzual nan inzirtir nise an ti bawk a. Organising Committee hi a tul anih chuan Chief Minister kaihhruaina hnuaiah awm se tih te an sawi bawk a, lawmthu sawi tul naah ziak ngeia dah nise an ti bawk a, Chapchar Kut ni ah Kut ni a ni tih kan hriat tlanna turin leh kan hlut zual sauh theih nan khawilai laiah emaw Mizo lam emaw, kan nunphung tilang thei tarlan ni se tihte an sawiho a ni.

Review meeting-ah hian Organising Committee member 19 an kal a ni.