Chief Minister Pu Lal Thanhawla hoin vawiin khan a office cabinet room-ah All Mizoram Farmers’ Union (AMFU) ina a bultum, ‘Green Revolution Mizoram Movement’ chungchang sawihona neih a ni.

Chief Minister chuan thuhma sawiin, sorkarin a duh ber leh a uar ber chu ei leh bara intodelh a ni tiin, kan ramin kum khata thla thum ei kan thar awrh chauh a ni a ti a. Chuvangin ei leh bar leh sum leh paiah intodelh turin hma kan la mek a, kan hmanrua ber NLUP pawh AMFU in min phur puiin, tha taka an thlawpnaah lawmthu kan sawi a ni a ti a. India in zalenna a neih atangin intodelh turin leh retheihna umbo turin nasa takin hma ala nghal a ni a ti a. Kum 1970 chho bawra ‘Green Revolution’ alo thlen khan hmarchhak bial hi a huam ve vaklo a ni a ti a. Tunah chuan tlangram state te kan intodelh theihna turin kawng hrang hranga hmalak chhoh mek a ni a ti.

Chief Minister chuan buh leh thlai hlawk zawka kalpui anih theihna tura mithiamten zirtirna leh kaihhruaina min hrilhte hi farmers ten ngai pawimawh thin se a duhthu a sawi a. Tunah hian India ramah buh leh thlai ina a ngeih, leitha-’fertiliser’ hman tlem lamah tan a lak nasat thu sawiin, organic farming kan uar chhoh deuh deuh a tul a ni a ti.

Sawihonaah hian AMFU hruaitute chuan ei leh bara kan intodelh theihna turin ni 11 March 2008 khan ‘Green Revulotion Mizoram Movement’ kalpui ni rawh se tia an lo passed tawh thu tarlangin, The New Economic Policy 2014 pawh tlangzarh anih tawh thu an sawi a. Green Revolution Mizoram Movement in a thil tum langsar zualte chu buh a tam thei ang ber thar a, ei leh bara intodelh, kan environment leh ecosystem siam thata humhalh, thlai leh thei thlan bikte din chhuah pui thama tharchhuah, kan tharchhuahte a hlawk zawka hralh anihna tura market linkage mumal tak siam leh a movement tihlawhtling tura sorkar nena tang tlang a, national leh international mithiamte ruaia funding agency hrang hrangte nena tan ho dan ngaihtuah te an ni a. Hmalak dan tur kawngah chuan adminstrative reforms siam thar, land reforms kalpui, environment & ecosystem development,economic development, changkham technology hman, agriculture marketing mumal taka siam leh green revolution movement calendar siam te an ni. Heng hmalak dan tur an chhawpchhuahte leh thil tul dang dangte member kal ten an sawiho a ni.

Sawihonaah hian sorkara line departement hrang hrang, Agriculture, AH&Vety, E&F, Minor Irrigation, Soil & Water Conservation, Horticulture, Fisheries, Seiculture leh Trade & Commerce hotute an tel a. Chief Minister hi Pu Lalram Thanga, Principal Secretary to Chief Minister in a tawiawm a ni.