Chief Minister Pu Lal Thanhawla hmalaknaa mipui ten hmasawnna hna chak zawk an hmuh theihna tura sorkar department tin ten ngaihtuahna thar hmanga hmasawnna ruhrel felfai leh sorkar inrelbawlna tha zawk a awm theih nana ruahmanna thar thawhkhawm tura thurawn apek bawhzuina hmasa ber atan vawiin khan a office cabinet roomah home department hmachhawpte a sawipui.
Chief Minister chuan hetiang thurawn a siamna chhante sawifiahin, kalphung thar tha zawk kan neih theihna turte, sorkar hnathawk thenkhat inhlawhfa ang maia inngaihna an neihte tih reh a nihna tur atante, inrenchem chunga sorkar kalpui a tul avangte, kan thawhchhuah chhunga khawsak thiam kan zir a tul avangte leh department hotu thenkhatin an enkawl department mamawh nilo, sum siam nana sum hman an chinte tihbo anih theihna tura departmente chu hmathar la tura rawn an nih thu a sawi hmasa a.
Home department enkawltu Pu R. Lalzirliana, Home Minister chuan rawtna an siam hrang hrang police chhawr tlak lohte compulsory/ medical pension-a kal tir te, police officer lian ten an hnuaia mite an mahni tana an chhawr thin tih tawpna tura chak zawka kalpui te, motor chhia siamna tih tlem anih theihna tura ‘central police workshop’ din te, DIG chin chunglam police officer ten motor pakhat aia tam kawl tir loh leh zin nana an mamawh tur PHQ atanga pool motor hman tir thin tur chungchangte leh hmeichhe police lak belh a tul thu a thlen te sawiho a ni. Hengte bakah hian khuarel chhiatrupna a thlen thulhah district tina ‘civil defence’ central sorkar rawtna ang din te sawiho bawkin, India ram puma district 140 zinga chhiatrupna thleng thei reng zingah Mizorama district zawng zawngte a tel vek thu tarlan a ni a. State dangah civil defence hna thawk tur hian Home Guard te hman nih thu tarlangin, Mizoram Home Guard pawh hetiang lama hmang tangkaia,lak belh tul tih anih thute sawiho a ni bawk a. Hetiang chhiatrupna thleng thei laka lo inruahmanna tur leh chetlakna turin civil defence atan central sorkar chuan kum 2014 – 2017 chhunga mamawh tur Rs.11.06 crore Mizoram sorkar a rawn pek tawh thu sawilan a ni bawk a ni.
Meeting-ah hian Pu Lalram Thanga, Principal Secretary to Chief Minister leh police officer engemawzah an tel bawk a ni.
