PHE Department leh Central YMA tangkawp ina a buatsaih ‘Tuihna Humhalh’ tih thupui hmanga Inter Branch YMA Drama Competition kal mekah ni 9.9.2014 (Thawhlehni) khan Drama Workshop, CYMA Hall, Tuikhuahtlangah a buatsaih a. Intihsiaknaa tel tum Branch aiawh mi pahnih theuh an kal a ni.
PHE Department atangin Er. Lalrothanga, Director, CCDU chuan tuihna humhalh kawnga mipuite mawhphurna sawiin hemi kawngah hian tanrual a ngaih zia leh mitin mawhphurna a nih thu a sawi a. Workshop kaihruaitu Pu Vanlalruata, CYMA General Secretary chuan he intihsiakna hi tuihna humhalh kawnga hmalakna pawimawh tak pakhat a ni tiin Mizo mipui rilru ah zirtirna tha tak a tuh ngei a beisei thu a sawi.
He hunah hian Drama intihsiakna tura judge tur mi pahnih Pu H. Chhawntluanga leh Pu M.S. Ralte ten paper an buatsaih a. Anni hian he intihsiakna hi a hlut lehzual theihnan leh Mizoten lemchan kawnga hma kan sawn theihna turin drama kalphung tlanglawn leh inkaihhruaina an sawi a ni. Mithiam pahnihte hian thu an sawi zawh hnuah zawhna leh chhanna hun hman leh a ni a. Mipuiten intihsiakna tura an mamawh leh an hriat duh te zau takin an sawi ho nghal a ni bawk.
Tuihna Humhalh tih thupui hmanga Drama Competition hi October ni 21 atanga tan tur a ni a, ni 21-24, October, 2014 hian Elimination Round an nei ang a. Ni 28-31 October, 2014 hian Second Round neih a ni leh ang a, Final Round hi November ni 7-ah neih a ni ang.
Lawmmanah Pakhatnain cheng nuai khat leh trophy an dawng ang a, Pahnihnain cheng sing nga leh trophy, Pathumnain cheng sing thum leh trophy an dawng ang a. Palina atanga sawmhnihnain cheng sang nga leh citation an dawng ang a, a tel hrim hrimin lawmman cheng sangthum man hu an dawng bawk ang. Mimal titha lawmman an siam dawn bawk a. Best Director leh Best Scripwriter dawngtuten cheng sangnga leh citation an dawng ang a, Best Actor leh Best Actress ten cheng sanghnih leh citation an dawng ang a, Best Supporting Actor leh Best Supporting Actress ten cheng sangkhat leh citation an dawng bawk ang.
A tel tur fixture hi 7th October, 2014 zanah tihchhuah a ni ang.
