Mizoram sorkar flagship programme NLUP hman tanna ni, ni 14 January 2011 kha Kut Hnathawktute Ni tia hman tan a ni a,chu ni chu vawiin khan Synod Conference Centre ah Chief Minister Pu Lal Thanhawla hoin hman a ni.

Chief Minister chuan kut hnathawktute tel loin khawi ram mah a kal theilo a ni tiin, kut hnathawktute hi mi zahawm, mi pawimawh an ni a an puala ni hman hi an phu reng a ni a ti a. Vawiina seminar bautsaih a ni bawk chu a inhmehin a lawmawm hle a ni a ti a. Buh thar tam kum te puang a hun kan hmang chho te hi AMFU leh mi thahnemngai te hmalaknain buh thar pawh a pung ngei bawk a, a lawmawm rualin hma kan sawn tih a tilang a ni a ti.

Khawvelin a buaipui em em sik leh sa danglam, climate change leh boruak lum zual zel, global warming te hi a venna tha tak pakhat chu NLUP hi a ni a ti a. NLUP hian UNO kawngkapui pawh kik hawng tawhin tunah hian agency pali ILO, FAO, UNDP leh UNIDO a mithiam ten rawn luhchilhin, Mizoram hmun hrang hrang leh kut hnathawktute a hmun ngeiah an rawn zirchiang a, NLUP chu thawhpui turin tunah hian an inbenbelna tur office te ruahhman mek a ni a ti a. NLUP chu project tha tak a ni tih central sorkar pawhin hriaiin, sum kan dil aia tam min rawn pe nghe nghe a ni a ti. Kohhran hrang hrang te leh mi thahnemngai ten an tuipui hle tih sawiin, Chief Minister chuan NLUP sum hi pakhatmah a pelhe tur a nilo a ti. Chuvangin he programme hi rinawmna, taimakna, dikna leh Pathian tihna nung nen kalpui a ngai a ni a ti a. Mi thenkhat NLUP thil tum dan kalh zawnga kal an awm thin chu a pawi hle a ni a ti a. Chief Minister chuan mau sawngbawlna changtlung tak nei turin tunah hian Taiwanese Technology hmang tura ruahmanna kalpui mek a nih thu pawh a sawilang a ni.

Chief Minister chuan NLUP dawngtu 81.6% chuan hlawhtlinpui ngei an in beisei a, 98.3% chuan an thlai thar zawrhna turah harsatna neih an in ring lo a, 98.3% in eizawnna nghet a siam sak ngei an beisei bawk a, 91.3% in eizawnna dang an neih belh theih an in beisei bawk a, 80.6% in line department te enkawlna tha an ti a, Synod Social Front Social Audit ah a dawngtute “loneitu tangrual pawl” (Farmers’ Association) anga insuihkhawma hma lakna a awm chuan kawng tam takin a dawngtuten an klawkpui leh zual an beisei a ni a ti.

NLUP Nodal Minister Pu R.Lalzirliana, Agriculture Minister chuan NLUP hian kum 5 hmel a hmu tan mek a, hemi hun chhunga mipui, ram hruaitute leh kut hnathawktute zawng zawngin NLUP hlawhtlinna tura kut hnathawktu ten theihtawp an chhuahpui naah lawmthu a sawi a. Kum 2015 -16 atang chuan kal dan thara kal turin uluk taka ruahmanna siam mek a ni a ti.

NLUP Implementing Board Chairman Pu JH Rothuama, MLA chuan kut hnathawktute ni hi inpek thar lehna ni a ni a ti a.NLUP hnuaiah a thlawna sum sem ringawt a nilo tiin, khawsak harsate leh miretheite khaichhuahna tura tanpuina leh hnathawhna tur anih bakah hnathawhna atana ruhrel infrastructure siamna tur a ni a ti a. Tanpuina sum hi vawiin atanga a dawng tur thlante hnenah sem chhunzawm a ni ang a ti.

Chief Secretary Pu Lalmalsawma, IAS pawhin thusawiin, NLUP avangin dinhmun tak zawkah chhungkaw tam tak hlankai an ni tawh a ni a ti.

Kut Hnathawktute Ni ah hian Ministers, Parliamentary Secretaries, Official pawimawh tak tak, NGO leh AMGU member thahnem tak an tel a ni.