Vawiin khan Champhai DC Conference Hall-ah Champhai District huam chhunga kuthnathawktute puala ni bik "Farmers' Day, 2015" chu hman a ni a. He hun hi Pu R. Vanlalsawta, Addl. Deputy Commissioner, Champhai chuan kaihruaiin, report leh thusawi hrang hrangte ngaihthlak a ni.

Pu R. Vanlalsawta chuan kuthnathawktute chawimawina hun bik ruat chu thil awm reng a nih thu sawiin, kumthar a nih angin inpekna thar nen thawk tlang turin kalkhawmte chu a sawm a. Sorkar flagship programme NLUP chu rinawm leh hlawhtlin ngei tum a tanpuina dawngtuten an kalpui a pawimawh rualin, line department-te pawhin a sem bakah beneficiary-ten an hlawkpui em tih thlenga enzui kawngah tan la se a tih thu a sawi a. Ram puma hmasawnna rualkhai tak a awm loh chuan ram hmasawnna hi a belhchiantlak tak taklo a ni tiin, kuthnathawktute hamthatna ngaihtuah zel chu a pawimawh thu a sawi a ni.

Vawiin hunah hian NLUP Nodal Officer leh NLUP Line Department atang ten report ngaihthlak a nih bakah AMFU hruaitu atangin thusawi ngaihthlak a ni a. Kalkhawmten NLUP kalpui dan chungchanga zawhna an neih te leh harsatna an neihte sawihona hun neih a ni bawk.

Champhai District-ah hian NLUP 1st Phase leh 2nd Phase chu sem fel deuh vek a ni tawh a. 3rd Phase leh 4th Phase kalpui tan tawh niin, 3rd Phase hnuaiah hian beneficiary 3,652 awmin, 4th Phase hnuaiah mi 1,749 an awm a. Soil & Water Conservation Department hnuaiah nikum 2014 chhung khan hmunphiah (a ro) 952.2 kg tharchhuah a ni a. AH & Veterinary Department chuan district huam chhunga cluster pahnih chu model village a puan tumin hma a la mek a. Environment & Forest Department chuan 1st Phase-ah cheng nuai 275 chuang semin, 2nd Phase hnuaiah cheng nuai 205 chuang an sem tawh a. 3rd Phase-ah cheng nuai 12.03 sem a ni tawh bawk.

Vawiin Kuthnathawktute Ni hmannaah hian Champhai District chhunga NLUP line department hotute, AMFU member leh hruaitute, VLNC member-te leh media lam te an kalkhawm a. Hun hi Pi Lalnunmawii, SDC leh NLUP Nodal Officer ni bawk chuan lawmthu sawiin a khar a ni.