Vawiin chawhnu dar 1 : 00 khan DCs office kawtah Kuthnathawktute Ni “Farmer’s Day” chu hlawhtling taka hman a ni. Pu R.T. Zachono, CEM, MADC chu khuallian niin; Pu Beila Khithie, Addl.DC chu khualzahawm a ni.

He Ni hmanna inkhawm hi Pi Marilyn Rualzakhumthangi, SDO (S) & Nodal Officer, NLUP Implementing Board, Saiha chuan a kaihruai a, Rev. Dr. M.Zakonia Moderator, E.C.M. chuan hunserh a hman hnu in, NLUP Line Department hrang hranga Head of Office ten an Department theuh hmalak dan leh hmachhawp mekte leh a hlawhtlin dan te report an pe a.

He Ni hmanna a Khuallian Pu R.T. Zachono, CEM, MADC chuan thu sawiin Kuthnathawh hi Pathianin mihring te hnenah mission a pek hmasak ber ( God’s First Mission to mankind ) a ni a, mihringte dam khawchhuahna leh hmasawn zelna hi kuthnathawhah a innghat a ni, a ti. Ram leilung behchhana eizawnna ngialnghet neih ram a piang ram changkang leh hmasawn an ni thin a ni, a ti bawk a. Kalkhawmte chu taimakna, tumruhna, chhelna leh huaisenna nen theihtawp chhuaha hlawhtlin tum turin kuthnathawktute chu a chah bawk. Khualzahawm Pu Beila pawhin thu sawiin kuthnathawktute chu an hmabak hlenchhuah tuma theih tawp a chhel leh huaisen tak a bei tur leh taima taka hna thawk turin a chah bakah an hnathawhna a an harsatna kawng hrang hrang te pawh NLUP Line Department hotute hnena thlen thin turin a chah a ni.

Thusawi tawi Dr. Chawngkhuma Chawngthu, President, AMFU, Saiha leh Pu V.B. Sachai, President, Joint VC leh Village Level NLUP Committee, Representative ni bawk ten an nei bawk. Programme karlakah zaithiam tak takte zai ngaihthlak ani a, Kuthnathawktute Ni hmanna ah hian Saiha khawpui chhung veng hrang hrang VC te, Tlawmngai pawl hrang hruaitute, Department hrang hrang hotute leh Chanchinbu mite an tel kim hle a, Pu Lalremruata Sailo, SDC Saiha chuan lawmthu sawina neiin he Ni hmanna hi ati tawp a ni.

Vawiin Programme hmanna-ah hian Saiha town area chhunga kuthnathawk mi entawn tlak mi 3 Pu te: K.Sawma, Lalsavuta leh Kailasha hnen Rs 2,000/- lawmpuina tangka fai CEM in a hlan bawk a ni.