Vawiin chawhnu khan Mizoram Road Fund Board chu an Chairman Pu Lal Thanhawla,Chief Minister hoin a Office Conference room-ah an thukhawm.

Chief Minister chuan thuhma sawiin, Mizoramah hmun dang aia motor kawngpui siam a hautak bik thu a sawi a. Hei hi Union Minister for Surface Highway kalta khan a hriatthiam loh avanga a to nachhan bik a hrihfiah thu a sawilang a. Kan kawngpuite siam tur hian tender te hi Mizoram pawnlam mi contractor, Mizoram leilung awmdan hre lo ten an thawh thin avanga harsatna tam tak a awm thin a ni a ti a. Kan harsatna tam zawk hi chu a enkawlzuina tur sum awm loh vang a nih thu sawiin, Pu Hawla chuan asset tha tak building emaw kawngpui emaw te hi kan siam mai a, amherawhchu a enkawlzuina lamah sum a awm thin loh avangin harsatna kan tawk a, rei tak tak chhe chung chunga hman angai thin a n a ti. Kawngpui siam dawna a leilung awm dan, soil zirchian hmasak a pawimawh thu sawiin, Mizoramah lungchang tha kan neih loh avangin kawng siamah harsatna kan neih phah thin a ni a ti.

Meeting hian kawng siamna tur sum engtinnge kan neih theih ang tih chu an sawiho ber a ni a. Rawtna hrang hrang memberte hian tha tura an rinte an sawi hlawm a. Board hi kawngpui siam leh enkawltu tur anih thu an sawi a. Chief Minister chuan Mizoram chu state naupang berte zinga mi leh pachhe ber a ni a ti a. Tax lak thei angahte pawh state dangte aia a tlem daih zawk thu a sawi a. Mizoramah chuan road tax hi motor C.C. tam leh tam lohah lak thin anih thu member ten tarlangin state dangah chuan motor man tam dan a zira chhut a ni an ti a. Road tax chu 4.4% chauh lak anih rualin state dangah chuan motor man to dan a zirin 16% lak anih thin thu an sawi bawk a. Hei bakah Diesel ah 12% tax leh petrolah 20% kan lak laiin Assam sorkar chuan dieselah 16.5% leh petrolah 25% an lak thu tarlan ani bawk a ni.

Board member turin department leh pawl hrang hrang aiawhte ruat an ni a. Chief Minister chu ex-officio Chairman, Principal Secretary, PWD chu member secretary leh member turin Fianance Commissioner, PWD Chief Engineer (Road), Taxation department Commissioner, MHIP, Police IGP, Drivers’ Union, MUP, MCU, Transport Director leh Secretary, Planning te an ni. Mizoram Road Fund Act hi 2007 khan Mizoram sorkarin a lo passed tawh a, a Rules erawh 2010 ah duanfel a peih a ni.