Mizorama Organic Farming kalpui dan tur vawiin khan Chief Minister Pu Lal Thanhawla hoin a office conference room-ah sawiho a ni.

Sawihonaa thuhma a sawiah Chief Minister chuan organic farming hi Mizoramah chuan tih palh thila organic mai (organic by accident) nia a hriat thu a sawi a. Organic certification te hi a process a buaithlak thu sawiin engtia harsa nge a nih tihte sawiho a tul dawn a ti a. Central sorkarin ‘organic farming in the north east’ a tih fo te hi zirchian ngai a ni a ti a. Kan kalpui thei ang em tih sawiho a ngai dawn a ti a. La zirchian tur kan ngah hle a ni a ti. Tun kan dinhmun rihah chuan kan arkhawthimdai mai ang tih a hlauhawm a ni a ti a.Planning departmnet lamah pawh agriculture lama mithiam te pawh kan neih a tul ang a ti a. Tuna phai lam atanga thlai kan lakluhte hi fertiliser leh pesticides maia enkawl lente anih bakah mihring tana chemical haluhawm ‘DDT’ tena an enkawl a ni tih sawi thin a awm tiin, hengte hi zirchianga kan fimkhur a tha a ti a. Vairengte ah lo check a, lo enfiah te pawh ala ngai ang a ti.

Organic farming ah chuan fertiliser te hman a nih loh avangin a to a, tharchhuah a tam har bik avangin mi nazawng tih theih a nilo a ni a ti.Chuvangin engtinnge kan kalpui ang tih te ngaihtuah tlan a tul a ni a ti. Organic Farming ah hian fertiliser leh rannung hlo pesticides hman a ni ve lo a, hei vang hian kan chhehvel boruak, nungcha leh thing leh mau te tan a tha a, a tharchhuah te mihring ei atan a thianghlim bik em em a ni. Meeting-ah hian Mizoramah organic farming kalpui ni ta se, a enkawl tu tur te hi line department ah te dah mai tur nge, enkawl tur bik agency kan ruai ang tih te an sawiho a. Chubakah eng thlaite nge kalpui a nih ang tihte an sawiho a, tharchhuahte hralhna tur market turte ngaihtuaha sawiho a ni bawk.

Mizorama organic kalpui hi hectare 1000 - 1500 zau a ni a, aieng, sawhthing leh hmarchate te chingin, CDAR, Suminter leh Zothar Foods ten an kalpui a. Heng bakah Mandarin serthlum, Lakhuihthei, Hatkora, Sapthei thei te tan beiseina a sang a, hmarcha, aieng leh sawhthing ten an ngeih hle bawk a ni tih meeting-ah hian tarlan a ni.

Organic Farming chungchanga meeting hi NLUP Implementing Board ina a rawt, Planning department ina a kalpui a ni a. Ah & Vety, Fisheries, Horticulture leh Agriculture Minister te an tel a, Vice Chairman, State Planning Board leh NLUP Implementing Board Chairman leh Member Secretary, State Planning Board te bakah Secretary leh department hotute an tel bawk a ni.