Vawiin khan Paliamentary Secretary for Higher and Technical Education Pu H. Zothangliana chuan a bial chhunga Siachangkawn khaw kum 25 tlin lawmna a hmanpui a, Siachangkawn khaw mipuite chu sawrkar thawhpui zel turin a sawm.

Pu H. Zothangliana chuan Siachangkawn khua chu kum 1990 January thla atanga ding tan chauh mah nise hmasawnna hmel duhawm tak tak a hmu hnem tawh hle a. Khaw lian tak ni lo mahse sawrkar hnathawk leh lehkhathiam a ngah tawh hle a ni. Hetianga hmasawnna duhawm tak a neih theih chhan chu sawrkarin hmasawnna Project hrang hrang a neihte tha taka khaw mipuiten an thawhpui vang te, hmasawn duhna thinlung leh inpekna rilru an neih tlat vangte nia a hriat thu a sawi a. Hmasawnna hna thawh zelna turah Compensation leh therhlo engemaw mai mai vanga harsatna siam lo ngam turin a chah bawk. Pu Zothangliana hian Silver Jubillee puala buatsaih lehkhabu (Souvenir) Silver Par chu a tlangzarh bakah Silver Jubillee lawmpuinan tanpuina a hlan ani. 

Pu Zothangliana hian zingkarah Jubillee Lungphun mawi tak chu a hawng bawk.

Siachangkawn hi kum 1898 khan lal hmingthang Ngunlingan a thut a, mahse kum kua emaw chauh a luah hnuin Bualpuiah khaw thar a sata. Chumi hnuah kum tam tak luahtu an awmloh hnuin Chhimtuipui kama khaw pakhat Fungkah khua chu leimin nasat vangin LADC sawrkar chuan kum 1990 January 15 khan Siachangkawn ah hian a sawn chho ta ani.

Fungkah mipuite pawhin lawm takin Siachangkawn hming hi an pu zui ta a Sai Chamna (awm chawtna) hmun tihna ani. Fungkah khua Siachangkawn-a insawn hmasa ber te hi chhungkaw 54 an ni a, tunah chuan in 186 zet ni tawhin mihring pawh 890 an cheng mek.

Vawiina Silver Jubillee lawmna inkhawmah hian LADC Chairman Pu F. Rualirh chu khualzahawm a ni.