Mizoram State Health Care Society (MSHCS) Governing Body Meeting vawi 13-na chu vawiin khan Chief Minister Office cabinet room-ah Chief Minister Pu Lal Thanhawla, Chairman, MSHCS kaihhruaina hnuaiah neih a ni.
Meeting-ah hian thurel tur pahnih chhawpchhuaha sawiho a ni a. Agenda hmasa zawkah khawsak harsa zawk mirethei ten man tlawm taka damdawi, generic drugs an lei theih dan tur chungchang sawiho a ni a. Generic drugs hi damdawia chemical awm ang ang hmingpu mai, damdawi siamtu company hrang hrang tena a chemical ken tel inang reng tho si, hming hran hran an puttir thin, fakmawi leh a tuamna kawrte hralh nuam tura siam brand name drugs to tak takte ai hian a man zahve deuhthaw a hniam an ni a. He schem hi Central sorkara Ministry of Chemical & Fertilisers, department of Pharmaceuticals ina a rawt chhuah a nih thu tarlan a ni a. A bul tan nan hetiang damdawi dawr hi Aizawl Civil Hospital compound chhungah MSHCS enkawlna hnuaiah Jan Aushadhi (JAN) Generic Drug Store siam nise meeting chuan a ti a. Hei hi district tin bakah PHC ah te pawh la kalpui chhoh zel tura tih a ni.Generic drugs leh brand name drugs te hi taksa a a hnathawh dan a inang reng a ni tih meeting-ah hian sawilan a ni bawk.
Hemi bakah hian Aizawl Municipal huam chhunga private employers hrang hrang private school te, nursing home leh a dang dang tena hnathawk tur an chhawrte tana hamthatna tur Employees State Insurance Scheme (ESIS) hman ve theih dan tur sawiho a ni a.He scheme hi ESI Corporation ina kalpui a ni a. Private institutiona hnathawkte hi dam loh thulhah hlawh an hmuh loh thin avangin an theih loh chhung zawng hlawh an hmuh loh thin hi ESIS atang hian siam sak an ni thin dawn a ni. Amaherawhchu a ruaitu employer khan ESIC ah hian sum chhunluh ve tur share an neih a ngai dawn a, hemi anih avang hian an inkarah inrintawkna siam turin meeting neih hmasak ala tul tur thu meeting chuan a rel a ni. Tunah hian ESI Dispensary dinna tur Urban Health Centre, ITI chu thlan fel tawh anih thu tarlan a ni bawk.
Meeting ah hian kum 2014 - 2015 chhungin RSBYa inziaklut mi 152983 awmin, MSHCS ah mi 111678 an inziahluh thu tarlan a ni a. Hemi chhung vek hian RSBY hnuaia damlo tana sum pekchhuah chu Rs.1,47,22,460/- niin MSHCS hnuaiah Rs.83,54,626/- pekchhuah anih bawk thu tarlan a ni.
Meeting-ah hian Pu Lal Thanzara, Minister of State for Health, Pi L.Tochhawng, Chief Secretary, Pi L.N.Tochhawng, Finance Commissioner leh Health department officials te bakah MSHCS member thenkhat an tel bawk a ni.
