Mizoram State Urban Livelihood Mission (MzSULM) chuan vawiin khan an Chairman Pu Lal Thanhawla, Chief Minister hoin a office cabinet room-ah Governing Council Meeting hmasa ber an nei.

Chairman chuan thuhma sawiin ram hmasawn chho zelin thingtlang miten eizawnna tha zawk beiseiin, khawpuiah tam tak an pem lut a. Mizoram phei chu kan khawpui ber Aizawlah chuan mihring nuai thum dawn kan tling tawh a ni a ti a.Chutiang bawkin district khawpui hrang hrangah pawh mihring kan pung belh zel a, tunah chuan India ram State zingah ‘urbanization’ a sang ber kan ni hial tawh a ni tiin, khawpuia chengte hi 51 % kan ni tawh a ni a ti. Chief Minister chuan khawpuiah eizawnna a awlsam zawk avangte, zirna leh hospital bakah mihring mamawh tha zawk leh tam zawk a awm avangte in thingtlang atangin kan pem lut nasa hle a. Hemi anih avang hian eizawnna tling leh an dinchhuahna tura kawng dap sak turin sorkarin ‘urban livelihood mission’ hi a din ta a ni a ti. Sorkar flagship programme NLUP ah pawh khawpuia mirethei engemawzat chu kan telh tawh nghe nghe a ni a ti.

Sorkar laipuiin khawpui miretheite khawsak chawikan a tul tih hriaiin mission mode approacha kalpui turin ni 24 September 2013 khan National Urban Livelihood Mission (NULM) a din a. Hemi zulzui hian State tinin mahni state urban livelihood mission a din ve a ni. He Mission hian khawpui mirethei chawikanna programme kalpui thin ‘Swarna Jayanti Rozgar Yojana’ (SJSRY) chu a rawn thlak a. Mizoram State tan he Mission hnuaiah hian kum khat chhung atan Rs.10 Crore dah a ni.

Mizorama SJSRY hmalakna hrang hrang lo neih tawhte Pu Zodintluanga, UD&PA Minister chuan tarlangin, BPL hnuaia mi 17806 hnena skill training pek te, PPP mode a Training Centre din te, NEILIT ah BPL tan seat 15 hauhsak te, TNT leh Gilead special Schoola Skill Training Centre hawn te bakah hmeichhiate tan Self Help Group (SHG) dina Revolving Fund atanga tanpuina sum pek te leh kum 2012-13 chhunga SJSRY a state ti tha ber lawmman India President hnen atanga dawn anih thute a sawi bawk a. Minister chuan MzSULM ina hmalakna a neih hrang hrangte pawh a tarlang bawk a ni.

Meeting-ah hian sawiho tur agenda 5 chhawpchhuah a ni a. Social Mobilisation & Institution Development chungchangah SHG te ti chak tura North East Initiative Development Agency (NEIDA) rawih rawtna chu remtih a ni a. Support to Street Vendors chungchang sawiho ah an ni hi kawngpui sira inzuar, ‘hawkers’ kan tihte hi anih thu tarlan a ni a. The Mizoram Street Vendor (Protection of Livelihood & Regulation of Street Vending ) Act, 2011 chu Mizoram pumah chak taka kalpui anih theinan Autonomous District Council huam chhungah pawh kalpui ve tura biakrawn nise meeting chuan a ti bawk a. Mahnia eizawnna insiam, Self Employmen Programme kalpui anih theih nan Apex Bank leh Mizoram Rural Bank te chu interest subsidy in tanpuina sum pe turin leh a programme a tel ve tura sawm nise an ti bawk a. Hengte bakah miretheite chenna tur in sak sakna ah Social Welfare department chu thawhdun puiah sawm a, Mizoramah NULM hlawhtling taka kalpui anih theih nan State Implementation Plan duan pawh pawm a ni.

MzSULM Governing Council hi NULM Operational Guidelines in a phut angin ni 28 July 2014 khan din a ni a, member 17 an awm a ni.