September ni 7 2015-a tan ‘Lunglei Inter District High School Sports’ chu vawiin khan Thuamluaia Mual-ah a kharna neih a ni.

Inter District High School Sport Lunglei kharna inkhawmah hian Pu R.Malsawma, Chief Organiser, Lunglei Inter District High School Sports Organising Committee chu Chairman niin, Inter High School Sport Meet 2015 hi Lunglei District chhunga High school zirlai leh zirtirtute inpawhtlanna leh thawhhona tha zawk a awm theih nana buatsaih a ni, ti a sawi a. Pu J.Vanlalhruaia, Secretary, Organising Committee in technical report a pe bawk. Lunglei Inter District High School Sports-ah hian discipline hrang hrang - Athletics, Basketball, Taekwondo, Football, Volleyball, Table Tennis leh Badminton-ah te Lunglei District chhunga High School 41 ten intihsiakna an nei a ni. He Inter High School Sport buatsaih nan hian Directorate of School Education-in Rs. 80,000/- a pe a, tun tum Inter High School Sports neih atang hian Mizoram High School Games-a Lunglei District aiawh tur an thlang nghal bawk a ni. Kumin Inter High School Sport neih zawh taka discipline hrang hranga lawmman late hriatreng nan a bua siam tum a ni a, Lunglei District chhunga High School hrang hrangah copy pek vek a ni bawk ang.

Vawiin Inter High School Sport kharnaah hian Moria Public School, Hnahthial leh Baptist High School, Serkawn ten Football Final khelin Baptish High School, Serkawn hi si 1 faiin Football-ah an champion a; discipline hrang hranga ti thate chawimawina Certificate leh Medal hlan nghal a ni bawk.