Vawiin tlai khan Chief Minister Office cabinet room-ah Mizoram State Disaster Management Authority (SDMA) chu an Chairman Pu Lal Thanhawla, Chief Minister kaihhruainain Ramhlun Sports Complex chhehvela leikhi chungchanga hmalak dan tur an ngaihtuah.

Meeting-ah hian Chief Minister chuan helai hmuna lei khi a awm chu pawi a tih tak zet thu a sawi a, a rilru a kapzia sawi bawkin a khi zel tur dan dan zawnga, siam that ngai laite siam that dan ngaihtuah tura SDMA meeting hmanhmawh koh anih thu a sawi hmasa a. Meeting chuan helai hmun lei khik dante sawihoin, Geology & Mineral Resourses hotu ten lei chunglang riral tam avang te, field atang leh a chhehvel atanga tui putru a awm avang leh a leilung hrim hrim hi a ngheh loh avangte leh a hnip vangte anih thu an sawi a. Feet 25 a thukte lei an verh pawhin lei sakhat nghet tak a awm loh thu an sawi a ni. Helai khawtlangin an duhdan sorkar-a an thlen thin check dam siam te, tui luanna mumal tak siam an rawtte pawh sawiho a ni a. Meeting chuan hetianga hmalak hi a dik ber ang em tiin leh a thawhna tur sum dap dante an rel a.  Chak taka hmalak anih theihna turin technical committee dina chu chuan bawhzui dan tur ruahman se an ti a, ruah sur laia helai leilung a khawih dan leh tui luan dan te zir ni bawk se an ti a ni. Disaster management atan hian non plan ah sum dah anih thute sawiin, amaherawhchu a hman theihna tura siamrem angaih tur thu leh Mitigation Fund atang chuan sum hman theih dan a awm thute sawilan a ni. Tunah mai chuan ruahtui tlak lai anih avanga hmalak a harsat tur thu an sawi bawk a ni.