Vawiin khan Chief Minister Office Conference roomahChief Minister PuLalThanhawla hoin State Board for Wildlife Meeting neih a ni. Chief Minister hi he State Board for Wildlife Chairman a ni bawk.

Chief Minister chuan meetingin a tum ber chu ram humhalh chin chhung leh forest reserved chhunga venhim ngai leh hmasawnna hna thawh ngai chungchang a he State Board ngaihdan leh a pawmpuina lak anih thu a sawi a. Mizoram chhungah nungcha humhalhna hmun 10 a awm thu tarlangin, heng hmun hian ram 1370.75 Sq Km azau a luah a ni a ti a. Heng bakah hian nungchate leh sik leh sa humhalh nan Community Reserve 148.66 Sq Km azau humhalh a ni bawk a ni a ti a.

Chief Minister chuan mipuiten nungcha humhalh nachangte, biodiversity humhalh hlutnate an hriat chhoh hret hret avangin nungchate laka nunrawnna pawh a tlem sawt hle a hriat anih thu a tarlang a. Ramvahte hi dan phalloh ani tiin, ramvaktute anin tipalh fo a, Mizo danin an inngaidam leh mai a, hei hi dan kalh a ni a ti a, dan angin pawikhawihtu chungah dan lekkawh theih a ni a ti. Hetih lai hian ransa in mihring a khawih chungchangte leh huan thlai ransa in a tihchhiat thin te hriat tur a awm fo a, chuvangin a tuartu te chhawmdawlnan leh tanpui nan (exgratia) sorkarin Rs.15 lakhs vel a sen angai thin a ni a ti. Ramsate chunga natna hri darh, tunhnaia state ransa, saza thih puk pukna ang chi laka hma lak vat a nih theihnan AH&Vety kaltlangin Rapid Response Force din a nih thu Chief Minister hian a sawi a. Hemi bakah Selesiha Central Vety College nen State Level Consultative Committee din anih thu a sawilang bawk a ni.

Meeting-ah hian sawiho tur agenda 18 chhawpchhuah a ni a, chung zingah chuan Indo-Bangladesh Border Lighting atan ramngaw 4.70 hectare azau 33KV sub station dinna atan sahthlak te, Dampa Tiger Reserve chhungah kawngpui awmsa tih zauh nan forest ram 1.94 hectare azau ruahman te, Chikha hmuna Border Outpost siam te, State sava, Vavu (Mrs.Hume’s Pheasant) tlatna bial chhinchhiaha humhalh te,natna hrileng vanga state animal Saza tam tak thih chungchangte, lui leh luia nungchate humhalh te,tualchher silai khauh zawka khuahkhirh te,ramvah nana silai, sairawkherh leh thang khuahkhirh mek hi khauh taka khap te an sawiho a ni.

Meetinah hian board member-te bakah sawmbikte an kal tha hle a ni.