Mizoram State Disaster Management Authority (SDMA) chuan vawiin khan Chief Minister Office Cabinet Room-ah an Chairman Chief Minister Pu Lal Thanhawla hoin meeting neih a ni.

Meeting-ah hian thurel tur agenda panga chhawpchhuah a ni a. Chung zingah chuan Ramhlun Sports Complex-ah leh Ramhlun Vengthar huam chhunga leimin leh leitawlh khuahkhirhna atan leh leimin zel tur ven nana Mizoram sorkarin central sorkara ruahmanna DPR a thehluh tawha senso tur Rs. 21.02 Crore a pawmpui tawhah, Rs.5.555 Crore chu a hmahruaiah a rawn pek tawh thu tarlangin, hei hi SDMA chuan alo pawmpui a. Leiminna hmunah hian in a sak leh theih tawh dawn loh avangin leimin tuara ram hloh tawh zawng zawngte tan Ramhlun leh Chite inkara mimal ram awl zau tak chu sorkarin lei saka, an inbenbelna tur ram leh in din sak nise meeting chuan a ti a. He hmunah hian Ramhlun Sports Complex chhunga ram leh in hlohte chauh huam loa, Ramhlun Vengthar, Ramhlun Venglai, Laipuitlang leh Tuikual-a leimin vanga ram leh in chante pawh huam thei turah ngaih a ni.

Meeting chuan sorkar department zawng zawng huap tur, the ‘Mizoram State Disaster Management Plan 2012’ tih State Executive Committee (SEC) in alo pawm tawh chu SDMA hian a pawm bawk a. Hengte bakah hian SEC in a thuphunga a remtih tawh 14th Finance Commission atanga sum beiseiin, 5th IR Hqrs, Sakawrtuichhun-a State Disaster Response Force Training Centre tih changtlun leh Civil Secretariat, Khatla-a State Emergency Operation Centre din chungchangte pawh remtih a ni a. Hemi atana tul tur Deputy Director post, Assistant Director (Training/Operation) leh State Organiser post te siam SEC in alo remtih tawh chu SDMA hian a pawm bawk a ni.