Khawvel pum huapa upate tan a ni ruat “International Day of Older Persons” chu Mizoramah pawh vawiin khan Social Welfare Department buatsaihin Vanapa Hall-ah hman a ni a. He inkhawmah hian Mizoram Legislative Assembly Speaker Pu R. Romawia chu Khuallian a ni.

Pu R. Romawia chuan Upate Ni hman a ni thei chu lawmawm a tih thu sawiin, upate chu ram leh hman tan ro hlu an ni a ti a. Thlahtute ngaihsak leh ngaihhlutna hian kan ramah nghet takin bu a khuar a. Chutih rual chuan ram inrelbawl leh inawpna dang chho zelah upaten ngaihsak an hlawh tawk tawh lo hle in a ngaih theih bawk a. Hei hi sum leh pai hailuh lama thalai zawkte chu chahbi kawltu a ngaih an nih anga zah an hlawh chhoh zel avang te pawh a ni thei a ni, Khuallian chuan a ti a. Chuvang chuan hnam nun ze rilah kir leh a, aia upate zah a ngaihsan nachang hriatna a kan harhthar leh a tul a ni a ti a. Pu R. Romawia chuan upa kalkhawmte chu “damseina leh hmuingilna in zui zel se” tiin a duhsakna a hlan a ni.

Upate Ni lawmna inkhawm, Pi Vanlaldini, Social Welfare Director kaihhruaiah hian Khuallian chuan kum 100 tling tawh mi 16-te hnenah chawimawina pawisafai leh citation a hlan a, chawimawina hi Social Welfare Minister Pu P.C. Lalthanliana’n a tumsak a ni. Anni bakah hian kawng chi hrang hrang a mi chhuanawm thlanchhuah 10-te hnenah MUP Chawimawina thilpek hlan a ni a. Pu Vanlalnghaka Zote, Social Welfare Dept. Deputy Director chuan vawiin inkhawm a MUP unit kaltam ber pathum hnenah lawmman a sem bawk. He inkhawm hi Pu Sainghinga Sailo, MUP Headquarter General Secretary chuan lawmthu sawiin a khar a ni.