State pum huapa kangmei chhuak thei venna committee, State Level Committee on Fire Prevention, kum 2000 atanga hman tan chu vawiin khan an Chairman Pu Lal Thanhawla, Chief Minister hoin a office conference roomah thukhawmin, State Level Sub Committee on Fire Prevention rorelte pawmpui turin an thlirho.
Chairaman Pu Lal Thanhawla chuan kan piputen lo an hal avanga kangmei chhuak thei lakah an fimkhur thin thu sawiin, tunah hian kan peih ta vaklo em ni tiin, ram tikang duh hrim hrim misual kan awm a, sorkar hun tiam chhunga hal duhlo te leh roadside reserve hal kang duhte kan awm hi na taka a hrem dan kan ngaihtuah a hun hle tawh a ni a ti a. Kan ram kan tihchhiat lutuk hmain engemaw kan tih a tul tiin, ramngaw leh thing leh maute, chungleng savate leh luia nungcha te tha taka humhalh nachang kan hriat tlan a pawimawh tak meuh a ni a ti a. Angai renga kan kal chuan kangmei chhuak thei venna kawngah mipui lam kan tiphur zolo ang tih a hlauawm a ni a ti. Tipalh vang emaw tihluih vang emaw a ramkangte hi hreng (hman tangkai) phalloh tur a ni a ti.
Sub Committee in alo rel tawh angin Fire Prevention Week hi kuminah chuan kum dang aia hma a hman nise a tih chu ni 10-16 February 2016 hi Kangmei Venna Hapta ah hman nise meeting chuan a ti a. A hawnna hmun atan Lal Thanhawla Auditorium ni turin a pawm a. District hrang hranga lo hal hun inanga neih a harsat avangin kum danga tih thin angin 15th March aia tlai lovah hal zawh vek nise a ti a. Lengpui Airport leh a chhehvel khuate leh Kawnpui lam thleng pawhin meikhuin thlawhna tum leh thawkchhuak a tihbuai loh nan chawhnu dar 3 hnuah chauh hal nise a ti a. Sorkarin lo hal hun chhung tura a ruahman chu tha taka zawm anih theihnan AMC hnenah a hnuaia VC te chu uluk taka chik tura hrilh hriat nise meeting chuan a ti a. Hei bakah Chief Secretray in DC tinte chu hemi chungchangah Video Conferencing neihpui se tih rel bawkin, GAD lam atangin DC tinte chu khauh taka kalpui tura thupek siam bawk se an ti a ni.
Meeting-ah hian kum 2015 chhungin lo hal hun bituk zawmlo khua engmawzah a awm thu tarlangin Lunglei District bikah chuan khaw 145 ah khaw 3 chiahin an zawmlo a ni. Lo hal hun bituk zawm loh hi meeting chuan a ngai thu tak hle tih tarlan a ni bawk a. DC, DLAO leh VC te chu lo haltu te list tha taka vawng tur leh dan zawmlo te chhinchhiah tura hriattir nise an ti bawk a ni. Kangmei veng tha district leh khua anga lawmmansiamthin pawh chhunzawm nise meeting chuan a ti bawk a. A endik hna thawkturintlawmngai pawl NGO hrang hrang a ruat nghal bawk a ni. Aizawl dist chu GMN, Champhai chu STAM, Kolasib chu ASEP, Lunglei chu AMFU, Mamit chu SENVA, Saiha chu NSS, Lawngtlai chu CYMA leh Serchhip chu MUP te chu ruat an ni.
Ram tihkan pawizia leh kangmei chhuak thei laka a venna pawimawhzia zau thei ang bera tlangaupui chhunzawm tha meeting chuan tiin, YMA Group Conference neih thinah awareness campaign neiha, heta tana tul leh mamawh turte chu E&F deptt in bultum se an ti bawk a ni.
Meeting chuan kumina Fire Prevention Week atan thupuiah ‘ Ram Tikangtu chu Ram Hmelma a ni’ tih nise a ti a. Hei bakah ‘Fire Mascot’ siam ve nise tia sub coommittee in a lo rel tawh chu pawmin, mascot ah chuan Kangmei leh Sakhi lem tih chuang chu tha meeting chuan a ti a, hei hi poster ah te leh sticker ah te siam nise meeting chuan a ti bawk a ni.
