Vawiin khan School Education Department Parliamentary Secretary Pu Joseph Lalhimpuia chuan Connected Learning Initiative (CLIx) hawnna inkhawma tel turin Mumbai a pan.

CLIx Programme hi India ram State pali-ah hman tur a ni a, Mizoram pawh chung State zinga thlan chhuah niin, Chief Minister te hi hawnna inkhawma tel tura sawm an ni a. Chief Minister aiawhin Pu Joseph Lalhimpuia chu tel in, Delhi-a Office pawimawh thenkhatte a dawr nghal bawk dawn a ni.   

CLIx hi High sikul zirlaiten Mathematics, English leh Science subject-te tha, tlo leh rin tlak zawka an zir theih nana ruahman a ni a. Hemi atan hian TISS leh MIT te chuan Mizoram sawrkar leh MZU te nen inremna thuthlung an lo ziak fel tawh a ni.

A bul tan nan CLIx hi Mizoram chhunga High School 30-ah kalpui phawt a ni ang a. Kum hnih chhungin sawrkar High School 200-ah kalpui hman vek tum a ni.