Pu Lal Thanhawla, Chief Minister & Chairman, State Planning Board kaihhruainain vawiin khan NLUP Conference Hall-ah State Planning Board thar chuan meeting puitling hmasa ber an nei.

Thuhma a sawiah Chief Minister chuan State Planning Board chu sorkar thurawn petu, advisory body anih angin kawng engkima ram leh hnam in hma a sawn theihna tura ngaihtuahna ril hmang thin tu a ni a ti a. Hmasawnna tura ruahmanna a siamte chu state dangte nen pawha khaikhin tlak leh sorkar bawhzui tura chhawpchhuaktu a ni a ti a. Mizoramin state puitling kan nih kum 27 lai kan hman mekah hmasawnna hmuh tur thahnem tak a awm a, amaherawhchu duhthusam hmasawnna erawh kan la phak lo deuh a ni a ti a. Prime Minister Pu Narendra Modi in Member of Parliament (MP) te an bial theuha ‘Model Village’ siam tura thurawn a pek angin, chumi kaihhruaina zulzui angin MLA te pawh hian hman ve nise a ti a. Hei hi decentralised planning kalpui nan leh village master plan siam nan a remchang hle dawn a a hriat thu a sawi a. Pu Hawla chuan State Planning Board in Structural leh Administrative Reforms siam tura Road Map a buatsaihna turah member zawng zawngte chu theihtawp chhuah theuh turin a sawm a ni.

Meeting-ah hian agenda pawimawh tak tak engemawzah sawiho a ni a. Planning Commission thlak tura ruahmanna kal mekah leh Expenditure Management Commission din thar chungchanga a kaihhnawihin Mizoram sorkar alo inbuatsaih dan turah rawtna awmte sawiho a ni a. Mizoram Plan leh policy tharte tha thei ang bera kalpui anih theihna tura ruahmanna siam dan turte sawiho a ni a. Mizoram hnufual bikna laite zirchiang a, comparative advantage a neihte dawm kanga, plan project hrang hrangte a hlawhtlin ngeina tura a endik hna kalpui dan turte an sawiho bawk a. Central atanga sum tam zawk haichhuah anih theihna tura tan nasa leh zual lak a tul thute sawiho ani a.

Hengte bakah Centrally Sponsored Scheme 66 te Plan chhunga rinluh a nih avanga Planning Department chu thuam chak a tul thute an sawi bawk a. Sorkar hnuaia Plan Posts awmte zirchiang a, sorkarin thawktu a mamawh dan a zira hnathawkte siksawi leh a tul anga kaihhruaina siam te sawiho a ni bawk a. Power Sector Reforms kalpui dan tur an thlirho bawk bakah Agriculture Department in buh leh thlai tam zawk a thar chhuah theih dan turte an sawiho bawk a ni.

Meeting-ah hian Pu H.Liansailova, Vice Chairman, SPB, Pu Lalsawta, Minister (Planning), Pu K.S.Thanga, Parliamentary Secretary (Planning), Pu P.L.Thanga, SPB Full Member & Member Secretary, Pi L.N.Tochhawng, Finance Commissioner, Dr.C.Vanlalramsanga, Secretary, Planning, Prof.Lianzela, Expert Member, Prof.Vanlalchhawna, Expert Member, Prof. Tlanglawma, Expert Member, Pu Lalram Thanga, Principal Secretary to Chief Minister (Invitee) leh Pu Ngunlianchunga, Principal Adviser, Planning (Invitee) te an tel a ni.