National Trade Union of Mizoram (NTUM) chuan vawiin khan Vanapa Hall ah General Assembly vawi 25-na an hmang a, Labour & Employment, Industrial Training Minister Pu Lalrinmawia Ralte-in a hmanpui.
Khuallian Pu Lalrinmawia Ralte chuan thusawiin hnathawktu te hamthatna pawimawh zia hriaa miten an ngaihven tawh thu leh Assembly Session ah ngei pawh sawichhuah tam a nih dan te a tarlang a. Hnathawktu ten an chanvo dik tak an chan theih nana NTUM hmalakna chu lawmawm tiin Sorkar pawhin hemi puala Dan hrang hrang a neih te tihhlawhtling tura theihtawp chhuaha a bawhzui chhoh mek dante a sawifiah bawk. Muster Roll-a thawk te tana chawlh ruahmansak chungchang te, dah ngheh chungchangte leh NTUM Office hmun tur te chu Sorkarin a ngaihtuahsak mek thu te a sawi lang a, hnathawktu te hamthatna chak zawka bawhzui a nih theih nan Union Minister hovin hmarchhak Labour Minister ho te inhmuhkhawmna neih tum a nih thu te a tarlang bawk.
Khualzahawm Pu Lalhmachhuana, Director, LE&IT chuan hmun dangah thawktu leh ruaitu inkara buaina a thlen fo laia Mizoram ah boruak tha tak hnuaia NTUM ten hma an lakna ah lawmawm a tih thu a sawi a. An thawhrimna avanga hnathawktu te tan thil tam tak an sualchhuah tawhna ah lawmthu sawiin Dan-in a phal chinah an hamthatna tura thawk chhunzawm zel turin a fuih bawk.
NTUM General Assembly ah hian President Pu R.Lalrinawma pawhin thusawina hun a hmang a, General Secretary Pu Zoramliana Colney chuan report a pe bawk a, kum 2013-2014 chhunga an member boral mi 25 sunna hun an hmang bawk. Chawhnu lamah rorel leh hruaitu inthlanna te an hmang zui a ni. Tunah hian NTUM ah hian member 4752 an awm mek a ni.
