Vawiin khan NLUP Conference Hall-ah State Planning Board Meeting chief Minister Pu Lal Thanhawla hoin neih a ni.

Chief Minister chuan sorkar inrelbawlna chu a tha thei ang bera kalpui a duhthu sawiin, plan leh non-plan te hi kan hman pawlh thin tho avangin tihbo mai a tha em tihte ngaihtuah thin a ni a ti a. Hei hi State Planning Board member te pawhin ngaihtuahna lo seng se a ti a.Union budget 2015-16 pawh an thu hnai tih sawiin, engtinnge keini hi a rawn nghawng dawn tih kan lo thlir dawn chauh a ni a ti a. Tunhnai maia NITI Aayog thutkhawmah Prime Minister-in hmasawn tur kan nih chuan state tinte than dan hi a intluk tlan a pawimawh a tih thu a sawi a ni a ti a. State budget te pawh tunhma aia tih tam tul a tihthu a sawite pawh Chief Minister hian a sawilang a. Hmarchhak State Chief Minister ten central project kan kalpui thin, a senso 90:10 ni thin te hi central sorkarin 100% tum se tihte an sawi ani a ti.

Meeting hian Board thutkhawm hnuhnung ber ni 27 December 2014 a thurelte an ennawn a. Mizoram hmasawnna chak zawka hmalak anih theihna tura department hrang hrangte inlungrual leh tum mumal tak neia hna thawh anih theih nan ruahmanna siam dan tur ‘Approach to Development Growth Strategies for Mizoram’ an sawiho a. Ram dinhmun dik tak hriat anih theih nan leh hmasawnna hna mumal taka kalpui tura ruahmanna siam anih theih nan official data and statistics rintlak duang tura chak taka hmalak nise an ti a. Development Planning and Projects, Schemes leh Programme te, Monitoring te kalphung thar hmanga kalpui turin Chief Minister kaihhruaina hnuaiah chak taka hmalak anih thu leh institutional, process leh policy levels ah chak taka reform kalpui mek dan te tarlan a ni.

High Level Monitoring and Surveillance Committee development projects, schemes leh programme te hunbi neia thlirlet tur leh implementation chak taka kalpui anih na tura hmalatu tur pawh din anih thu tarlan a ni a.Hetah hian High Level Monitoring and Surveillance Committee I, Chief Minister kaihhruainain development projects leh schemes te Rs.50 Crore chunglam chin kum khatah vawi li tal thlirletna neih nise an ti a. Chutiang bawkin Chief Secretary kaihhruaina hnuaiah Rs.50 Crore hnuai lam chinah neih thin ni se an ti bawk a. Sectoral Surveillance Meeting pawh State Planning Board Vice Chairman kaihhruainain neih thin ni bawk se tiin, hetah hian Mizoram economy a sector tinte tih that dan thlirletna neih thin ni bawk se meeting chuan a ti a ni.

Meeting-ah hian Pu H.Liansailova, Vice Chairman, State Planning Board, Pu Lalsawta, Planning Minister & member, Pu Lalmalsawma, Chief Secretary & Ex-Officio member, Pu P.L.Thanga, Full time member & Member Secretary, Pu Haukhum Hauzel, Full time member & Member secretary te bakah member dang leh sawmbikte an kal tha hle a ni.