Communication & Capacity Development Unit (CCDU), PHE Department bultuma thawk chhuak, Clean Mizoram Cycling Expedition-a Serchhip leh Champhai tlangdung fang mek, Mission Veng Youth Adventure Club member Vanlallawmzuala Varte leh PC Lalramengmawia te chu vawiin khan Champhai an thleng a, Tourist Lodge-ah thuthar lakhawmtute nen inkawmna hun an nei. Cyclists-te hi PHED leh Sports Department hotuten Tourist Lodge-ah hian an lo hmuak a ni.

Vanlallawmzuala Varte chuan he expedition-a an kaldan hrang hrangte a tarlang a. Communication & Capacity Development Unit (CCDU) bultuma thawk chhuak an nihna angin an chawlhna khuaah faina kawnga Mizoramin hma a sawn theihna atan mipui zirtirna hun an hmang thin a. Khaw hrang hrangte chuan PHE Department hmalaknain bawlhhlawh paihna felfai tak an nei deuh vek tawh thu leh, a tlangpuiin khaw tinten faina kawngah hma an sawn hle tawh a an hriat thu an sawi a ni. An zin chhuahnaah hian harsatna lian tham an tawh loh thu leh, ralmuang taka expedition an nei thei chu lawmawm an tih thu an sawi tel bawk.

Vawiin hunah hian Pu Lalngilneia Colney, DYSO Champhai chuan thu sawiin, adventure club te chu mi chhanchhuak tura ke pentu pawimawh an nih thu leh, tunlaia faina kawnga mipuite kan harh zel theihna tura hetianga hma an lakna chu thil ropui tak a nih thu a sawi a ni.

Inkhawm kaihhruaitu Pu Zohmingliana, PHE EE chuan Clean Mizoram hnuaiah hian PHE Department-in nasa takin hma a lak mek thu te, tunah hian Champhai District-a rural area-ah faina beihpuithlak a kalpui mek thu te leh zirna in hrang hrangte nena tangrualin Champhai District hi District faia siam turin hmalak mek a nih thu a sawi bawk.

Clean Mizoram Expedition Cyclists-te hi Aizawl atanga an chhuah hnuah Tlungvel leh Serchhip an tlawh a, heta tang hian Champhai District-ah lutin Khawhai leh Khawbung te an tlawh leh a; hemi hnu hian Dungtlang, Vangchhia leh Zokhawthar te tlawh lehin vawiin khan Champhai an lut a. Vawiin vek hian Khawzawl panin Kawlkulhah an riak ang a, naktukah Saitualah hun hmangin Aizawl lam an pan leh dawn a ni.