Mizoram State Planning Board chuan vawiin khan Planning Conference hallah Chairman Pu Lal Thanhawla, Chief Minister kaihhruaina hnuaiah meeting neih a ni.

Meetingah hian Chairman chuan thuhma sawiin, fumfe taka hmasawn tur chuan luhchilh bik (focus) nei a, hnathawh dan tur mumal tak duanga thawhchhuah tur bituk neih tul a tihthu a sawi a. Mizoram chu kan vannei hle a ni tiin, industry lian neilo mahila tourism industry din theihna tha tak kan nei hi a ni a ti a. Tuna kan neih sa aia changtlunga siam tur chuan keimahni ngei hian ngaihtuah thar (idea) leh hmangchang kan hriat a tul a ni a ti a. Kan pipute rohlu kan neihte hi khualzinmite chuan angai ang anga hmuh an duh a, amaherawhchu keimahni hian tih tunlai kan tumna lamah chei danglamin a hlutna kan tichhia a, a vanduaithlak thin hle a ni a ti a. Chuvangin angai ang anga kan la neih chhunte hi tidanglam loin, anih ang angin humhalh tlat tul a tih thu a sawi a ni.

Chief Minister chuan Kaladan Multi Modal Transport Transit Project chu hmarchhak bial, abikin Mizoram ina hlawkpui tur a ni a, central sorkar leh ASEAN ramte pawhin an hlut hle tih a sawi a. Mahnia eizawnna insiamna kawnga pawimawh em em skill development pawh chak taka kalpui anih thu tarlangin, NLUP atanga hlawhtlinna awm chho mekte chu a lawmawm hle a ni a ti a. Sorkar chuan mau hi a hlawk thei ang bera hman tangkai anihna turin tunah hian China sorkar nen indawr mek anih thu a sawi bawk.

Meeting-ah hian intodelha hmasawn leh NLUP hlawhtlin chhoh zelna tura sorkarin ‘New Economic Development Policy’ a duan chu sawiho ber a ni a. Mizo tupawh hian ram tha tak, hausa taka siam theih kan nei tih hi hria a huaisen taka hmalam pan hi ka tih tur a ni tih an tarlang a. NLUP leh central atanga sum hmuhte leh state sumte hi agriculture leh a kaihhnawih hnuaia kuthnathawktute nen thawh hona bul tan a, thlai chin uar bik nei a link road siamte an sawiho a. Mau leh handloom, handicrafts leh agro-based sawngbawlna lam chak taka bawhzui tul an ti a. Hmasawnna ruhrel pawimawh zual bik kawngpui, lei, kawlphetha, tui, ICT leh sanitation & sewerage te chungchanga hmalak dan tur duan fel nise an ti a. Agriculture leh a kaihhnawih ahte mimal nen thawhhona siam tha an tih thute an sawiho a. Social service sector lama hmalaknaah policy guidelines siam a, focus area neih theih nise tihte an sawiho bawk a. Hengte bakah hian mipui nawlpui hamthatna tur leh sorkar hi e-governance a inthuam tira tih phuisui a tul thute an sawiho bawk a. Sum enkawl kawngah sorkar, district council, Aizawl Municipal Corporation, rural & urban local body thlenga ‘Public Financial Management Reforms’ neih ngei chi anih thute an sawiho bawk a ni.

Heng an sawiho takte ti hlawhtling tur chuan sorkarin hunbi ruat a, tum tak takna ‘political will’ a neih a tul thu leh, tih dan hlui kalsan a hma thar lak a thlakthleng ngai (change) awm te huaisen taka thlak mai zelte tul an tih thute an sawi bawk a ni.

Mizoram State Planning Board ah hian member 17 an awm a, an zingah hian sorkar atangin mi 11, expert member 3 leh non official member 3 an awm bawk a. Vawiin meetingah hian sorkar atanga membe 3 te zinbo lai anih avangin kal an kimlo a ni.