Vawiin khan Mizo Photographers’ Society (MPS) bultumin Chapchar Kut 2016 Photo Exhibition Vanapa Hall, Aizawl-ah neih a ni a. Information & Public Relation Director Pu Jim K Chozah chu khuallian niin a hawng.

Khuallian Pu Jim K Chozah chuan MPS Photo Exhibition chu chhinchhiahtlak a ni tiin kan ram leh hnam ziarang mawi taka phochhuahna hun remchang tak a ni a, thlalak chu document pawimawh leh rintlak, a nihna ang anga inpho chhuahna hmanrua pawimawh tak a ni, a ti. MPS member-te fuihna thu sawiin khuallian chuan, thlalak hi hna ropui leh hna zahawm a ni a, mite thlamuan thei leh tihlimtu a nih bakah khawtlang leh ram siam thatna kawngah pawh thawh hlawk thei berte zinga mi, hna sitawm loh tak mai a ni a ti.

Exhibition Hawnna programme-ah hian MPS President Pu Johny Ngurthansanga pawhin thu sawina hun a nei a, he exhibition chhim tur hian mi zawng zawng a sawm nghal a ni.

Photo Exhibition hawnna hi MPS Secretary Pu Malsawmdawngzela’n a kaihruaia, Chapchar Kut chhim turin Delhi lama Photographer-te pawh sawm an ni a, Exhibition-ah hian thlalak 146 vel zet pholan niin March ni 5 thleng a en theih dawn a ni.