Tukin zing khan Agricultural and Processed Food Products Export Development Authority (APEDA) – Confederation of Indian Industry (CII) leh Horticulture Department tangkawpin, loneitute tana thlai tharchhuah sawngbawl chungchanga training ‘APEDA-CII FACE Cluster Development Program for Export of Horticulture Products’ chu Aijal Club-ah Horticulture Minister Pu P.C. Lalthanliana’n a hmanpui.

Pu P.C. Lalthanliana chuan kan rama thlai tha duh kan tharchhuah theih si, a man tlawm zawk avanga phai ram atanga kan la chaw lut reng titawp turin loneitute chu chona thar a pe a, chutih rualin training buatsaihtute hnenah loneitute thlai tharchhuah hralhna kawng dap pui turin a ngen bawk. Minister chuan sawrkar rin lutuk avanga a thlawna engkim dawn kan tumna thinlung hi kan paih hma chuan kan hlawhtling lovang a, hlawhtling tur chuan tumruhna kan neih hmasak a pawimawh a ni, a ti. Training chu hlawk thei ang bera chhawr turin kalkhawmte hnenah duhsakna a hlan nghal a ni.

APEDA-NE Assistant General Manager Pi Sunita Rai chuan state sawrkar atanga beisei an neih tlangpuite a tarlang a. Thlai tharchhuahte chu ramdanga hralh thei tur khawpa thaa sawngbawl turin Cluster Development Program hi buatsaih a nih thu leh Mizoram chu hmarcha leh sawhthing export tura thlanchhuah a nih thu a tarlang bawk. An hmachhawpte tihlawhtling tur hian sawrkar chu loneitute thlangchhaktu tur leh training petu ni turin a duh thu a sawi bawk.

Loneitu lo kal te hnenah hian Spices Board Mizoram Horticulturist Pi Lalrinfeli, CII-FACE Counselor Pi Pratyasha Chakravarty leh Pi Sunita Rai-ten thlai tharchhuah sawngbawlna chungchang an zirtir a ni.